الثلاثاء، 20 مايو 2008

مشروع وطن

أنا لما رحت المدرسه
كان غرضى اعرف استهجى
كلمة وطن
انا لما خطيت خطوتى
انا رحت خطيت كلمتى
وكتبت فوق السطر ميـــــــــــــم
معرفش .. ميم معناها مصر ؟!!!
ولا الحروف اتشكلت من غير حنين!!
ولا السنين خلقت وهن
ولا الشجن يولد شجن
ولا الوطن مش راضى يكتب كلمته ويّا الانين
ولا البدايه قصدها مشروع وطن
--- ---
أنا كلمة متحاوطة بقوسين
لا عارف اهرب من ضلوعك
ولا عارف ابقى مش حزين
يا مصر يااما بتحبلى فى اليوم الــــــــوف
تفتكرى ليه الوحمه كانت فى الجبين على شكل خوف
ولا الحروف اتشكلت من غير حنين !!
انا ياما راجع لأجل خدى يكون مداسك
انا لما بفرح بفتكر اهلك وناسك
أنا صوت انين
لساه بينده بين نيلين
إتمد واحد جوه قلبك
والتانى شريان جوه قلبى
بيمدنى بطعم الحنين
لساه بيصرخ وساعات يئن
وساعات بيصنع معجزات حكايات وفن
وساعات بيكتب او يقول مشروع وطن
-- -- --
يا حبيبتى يللى
القلب محجوزلك تملى
يام القلوب الطيبه
وبرغم بعد الناس بلاقى ناس كتيره قريبه
مبقتش عارف من كتر حبك
هعمل ايه
تفتكرى انك هتيجى يوم وهتكرهينى وهكرهك
لأ معتقدش
تفتكرى انك تجرحينى وهردهالك واجرحك
لأ مفتكرش
تفتكرى انى فى يوم هخونك او هغشك واخدعك
لأ معتقدش
انا اصلى ماشى فى سكتك
ولا عمرى هرجع او هضن
معرفتش اكتب من زمان كلمة وطن
وكتبت ميم
مشروع وطن
-- -- --
يا مصر يااما متدمعيش
انا مش هسيبك متخافيش
عهدين عليا وعهد تالت
مش هبقى ساكت
مهما السكات بيتحكم فى صوتى
مش هبقى صامت
رغم موتى
راح هندهك وهتسمعينى
وهكلمك وتكلمينى
وهاحط ايدك جوا ايدى
واتمشى وياكى .. تسيبينى
تروحى تجرى ومن بعيد
راح تندهى .. تتبسمى
وهترجعى وتشبكينى
وتدمعى
متدمعيش
انا مش هسيبك متخافيش
عهدين عليا وعهد تالت يا حبيبتى
هتعلم ازاى اندهك
ما انا اصلى لما رحت المدرسه
كان غرضى اعرف استهجى كلمة وطن
وكتبت فوق السطر ميـــــــــــــم
معرفش ميم معناها مصر؟!!!
ولا الحروف اتشكلت من غير حنين
ولا السنين خلقت وهن
ولا الشجن يولد شجن
ولا الوطن مش راضى يكتب كلمته ويّا الانين
ولا البدايه قصدها مشروع وطن
انا أصلى م اليوم ابتديت مشروع وطن
ـــــــــــــــــــــــــــــــــــ
ـ
ـ
على الهامش
القصيده مهداه للعدد الاول من مدونات مصرية للجيب والذى هو بعنوان مشروع وطن
ملحوظه طبعا انتم عارفين انى اى كلام خالص فى الشعر العامى :)

هناك 24 تعليقًا:

واصطنعتك لنفسي يقول...
أزال المؤلف هذا التعليق.
Yasmin يقول...

ايه ده أنا أول وحدة أكتب تعليق هنا

بس بجد قصيدةتحفه جداااااااا
أصلي اليومين دول عندي حالة وطنية زايدة
بس بجد انت الكلام اللي انتا كاتبو جميل أوييييييييييي والله
ود أول مرة أزور فيها البلوج بتاعك
بس القصيدة دي عجبتني أوي وبالزات
-- -- -- -- -- -- -- -- --
أنا صوت انين
لساه بينده بين نيلين
إتمد واحد جوه قلبك
والتانى شريان جوه قلبى
بيمدنى بطعم الحنين
لساه بيصرخ وساعات يئن
وساعات بيصنع معجزات حكايات وفن
وساعات بيكتب او يقول مشروع وطن
---------------------------------

Fahd يقول...

جميلة قوي يا اخي

قليلا ما اقرأ زجل او شعر واتأثر بيه هكذا

شعرت به

وجدت احساس عالي

نعم نحب هذه البلد ولن تكرهنا ولن نكرهها يوما ما

رغم ما يحدث سنحبها

وعندنا الامل الكبير في ان تعود بلادنا كما نتمناها ونريدها زغم الحاقدين والفاسدين

شهرزاد يقول...

أنا كل ماجي أقتبس جزء عجبني أقتبس واحد تاني كمان لحد مالقيت اني هكتب الأبيات كلها
ان شاء اله ينجح مشروعك
مشروع الوطن
إلى الأمام دوماً

~ISLAM~ يقول...

على فكره انت مش اى كلام ولا حاجه فى الشعر العامى زى مانت قلت
بجد من اجمل ما فرأت فى حياتى
تسلم ايدك

احـمـد عصـام يقول...

صديقي أحسنت مع إني سمعتها قبل كده ولكن لم أستطع أن أخفي إعجابي بها
دمت مبدعاً

محمد إبراهيم محروس يقول...

جميلة القصيدة
وجميل شعورك بمصر
كدة
خالص تحياتي

Tamer Nabil Moussa يقول...

ازيك يا احمد

اخبارك اية

انا سعيد انك عرفتنى وسلمت عليا بجد فرقت معايا فى قاعدتى لوحدى

انت والناس الجميلة اللى سلمت عليا رفعت من معنوياتى

ابقى تعالة زرنى فى افكار حرة 1 انا كاتب كلمتين بساط عن الحفلة من واقع قاعدتى

ربنا يكرمك
.
تحياتى

واصطنعتك لنفسي يقول...
أزال المؤلف هذا التعليق.
ليله بكى فيها القمر يقول...

السلام عليكم
كلام جميل اوى
حاسه ابه بيخلى فيه قشعريره فى الجسم و انا بقراه كدا
و بيوجع اوى
تحياتى

الـسـيـدة نـون يقول...

الى الاحمدين مهنى والبوهى

الكتاب حجمه كويس
طباعته كويسة
الغلاف وحش
ومعلش اعذرونى انى بقول كدة
بس انا قلتلكم قبل كدة انى درست تصميم غلاف وبتكلم عن دراسة مش كلام وخلص
وكمان ده كان راى اختى وبعض اصدقائى اللى شافوا الكتاب
تقريبا كلهم اجمعوا ان الغلاف وحش
ودول مادرسوش تصميم غلاف يعنى وجهة نظرهم تعبر عن رأى القارئ العادى كمان
اللى مدرسش تصميم غلاف

بالنسبة لتقيسمات الكتاب
كانت محتاجة تكون ادق من كدة شوية
يعنى مثلا الكتابات الساخرة لوحدها والاشعار لوحدها
والخواطر لوحدها

امممممممممممممممم
ايه تانى
ايه تانى يا بت يا خيخة
اممممممممممممممم
سعر الكتاب كويس

انا مبسوطة
ماما وبابا مبسوطين من الكتاب
ماما قعدت تدعيلكم كتير لما عرفت ان الكتاب ده انتوا الاتنين ومعاكم صاحب دار النشر طبعتوه على حسابكم ومخدتوش حاجة من المدونين المشتركين
وطبعا كان منظرى زبالة قدام نفسى وانا سامعة ماما عمالة تهريكم دعوات
كنت عايزة اقولها انتى متعرفيش بنتك خيخة عملت معاهم ايه؟
نيهاهاهاهاهاع

ماما متأثرة جدا من كلمة مشروع وطن اللى انتوا حاطينها على الكتاب
قعدت تتأمل فيها وتعيدها لما تقريبا كانت هتعيط


انا مش لاقية الكتاب فى مكتبة عمر بووك ستوورز ولا فى مكتبة مدبولى
والكتاب اللى عندى انا خدته من رودى علشان ابص عليه واوريه لاهلى

يعنى من الاخر كدة انا عايزة اعرف الكتاب هينزل امتى وفين بالظبط علشان انا عايزة اكتر من نسخة

فيه ناس عايزة تشترك فى العدد التانى
ياريت تبقوا تعلنوا ازاى اللى عايز يشترك يعمل ايه بالظبط؟

انتوا حذفتوا كلمة الاظؤظة من البوست بتاعى
ودى حاجة مضيقانى بس مش مضيقانى اوى
انا بقول كدة علشان ارخم عليكم بس

عايزاكم تخدوا بالكم المرة الجاية
لما تيجوا تجمعوا الاعمال وعند الطبع
ابقوا خدوا بالكم امتى السطر ينتهى وامتى يبتدى
يعنى انا لاحظت مثلا ان جملتين لازقين مع بعض فى نفس السطر
وده مش صح
كان لازم مثلا السطر ينتهى عند جملة معينة او كلمة معينة
يعنى مثلا فى البوست بتاعى
كلمة اسهااااااال
دى كانت تتحط فى سطر لوحدها
ده مثل بس كدة على الماشى
علشان اقدر اوضحلكم وجهة نظرى



اممممممممممممم
لحد كدة معنديش حاجة تانية لو افتكرت حاجة هابقى اقولكم عليها

تحياتى ليكم والف الف الف مبروك
اختكم خيخة

الـسـيـدة نـون يقول...

اعلق بقى على القصيدة

القصيدة حلوة يا مهنى انت ليه محطتهاش فى الكتاب كانت تبقى اول بوست

ياريت تحطوها فى العدد التانى

سلام
اختك خيخة

الـسـيـدة نـون يقول...

قريت القصيدة تانى
جسمى قشعر

انشرها فى اى مكان خليها توصل لكل الناس يا مهنى

تحياتى ليك
اختك خيخة

أحمد سلامــة يقول...

لا يا ابو حميد جميلة
احساسها جميل وفيها صور ممتازة
كان في كلمات محتاجة تتشكل للنطق على شوية همزات يا ريت تعدِّلها زي مثلا :
الوف ، ياما ، هضن ، وهن الخ
يعني التشكيل بيريح من مطبات القراية في العامي بالذات وبيحافظ عالموسيقى بطريقة اسهل مش محتاجة حرفية من القاريء العادي
والسطر الاخير طبعا - في البوست مش في القصيدة - مالوش اي لازمة
امال اللي انت كاتبه ده ايه ؟؟
سودوكو ؟؟!!
القصيدة حلوة جدا طبعا
تسلم ايدك

إسلام منسي يقول...

بجد ماشاء الله
كلام روعة واحساس جميل
فعلا قصيدة جميلة

.:.-=- ELGaZaLy-=-.:. يقول...

جميلة اوى المحاولة يا مهنى...

-------------------
أنا كلمة متحاوطة بقوسين
لا عارف اهرب من ضلوعك
ولا عارف ابقى مش حزين
يا مصر يااما بتحبلى فى اليوم الــــــــوف
تفتكرى ليه الوحمه كانت فى الجبين على شكل خوف
ولا الحروف اتشكلت من غير حنين !!
انا ياما راجع لأجل خدى يكون مداسك
انا لما بفرح بفتكر اهلك وناسك
أنا صوت انين
لساه بينده بين نيلين
إتمد واحد جوه قلبك
والتانى شريان جوه قلبى
بيمدنى بطعم الحنين
لساه بيصرخ وساعات يئن
وساعات بيصنع معجزات حكايات وفن
وساعات بيكتب او يقول مشروع وطن
------------

الجزء دة عجبنى اوى ...

للاسف لم يقشعر جسمى وانا اقراها..

بس تعرف تحسها قريبة من تجارب جميلة لاشعراء كبار..

بس الحالة جميلة يا مهنى تحياتى

محمد عبدالحي بتاع بيطري يقول...

أزيك يا أحمد

هدية مقبولة ياسيدي

ولو أنك اكتفيت بالتذييل في الكتاب إلا أنه كان من الحاجات الحلوة اللي في الكتاب

وياريت تبعتلي ميلك أو تضيفني عندك لأني محتاج أقولك كام تعليق كدة على الكتاب .. يعني .. بدل ما أقولهملك في الفسحة زي نوران

سلام و بالتوفيق في العدد الجاي

jessy88 يقول...

انا بجد مكنتش عارفة اقرأ التدوينة ولا اسمع الاغنية الجميلة دى انا بحبها اوى وبمووت فى احمد ابو خاطر بس طبعا لما شفت اسم التدوينة جذب انتباهى وانت طبعا عارف ليه ههههههه فقرأت وحسيت ان تلك الكلمات تعبر بصدق عما كان فى ذهنى وقت كتابتى لتدوينة مشروع وطن وعلى فكرة حضرتك شاعر هاااااايل واحاسيسك ظاهرة بصدقها فى كلماتك الجميلة ربنا يوفقك ونشوفك شاعر كبييير

shaimaa samir يقول...

رااااااااااااائعة
فكرا
ومعنى
وسردا

ومبروك الكتاب
قلولنا العدد الاولامتى
ان شاء الله

تحياتى

عاشــــــ النقاب ـقــــة"نونو" يقول...

السلام عليكم
جمييييييييييييييييييلة
نورت الهدى ائتنا واتمنى زيارتي في القوارير فيها وفي مدونتيي عاشقة النقاب
على فكرة انا حضرت حفل المدونين وفاتني التعرف على حضرتك انا وزوجي تتعوض باذن الله
تحياتي

dodda يقول...

يا رب الفرحه اللى فى قلوب كل المدونين

اللى كنت انت سبب قوى ليها

تكون فى ميزان حسناتك

والقصيده ..حلوه
والاحساس قوى جدا
@---ز---

محمد عبد القوى يقول...

أنا قريت القصيدة فى رسالة الفيس بوك قبل ما أقراها هنا
لكنى كنت عارف ان التعلق هنا هكون أصدق وأفيد
والله العظيم جميلة جداً وهايلة قوى
لو أنت شايف ده مش شعر عامى وأنه أى كلام تبقى غلطان
وأخيراً يشرفنى أنك تزور مدونتى قلم الحرية..أنا بكتب شعر برضة بس على قدى

son's egypt يقول...

السلام عليكم
مبروك علي العدد الاوال
وعقبال الاعداد القادمة

•√أريـ السمر ـج√• يقول...

جميلة جدا و مؤثرة بجد ..

مبروك على العدد الأول و ان شاء الله من نجاح لنجاد

دمت بخير