السبت، 3 مايو، 2008

اتفاق

ـ المحه ياتى من بعيد يكتم ضحكته وانفاسه بيده ... ويصطحب كل اخوته يعتلى السرير ثم يبدا فى جريمته المعتاده معى ... فتيله طويله من الخيط الرفيع يبدأ فى تمريرها على وجهى حتى استيقظ فينفجروا جميعا من الضحك .. لكنى اليوم انا هو الشخص الذى سيضحك لأنى مستيقظ بالفعل ... يقترب اكثر واكثر .. يشعر بالاطمئنان لكونى اصدر صوتا يدل على استغراقى فى النوم حتى يقترب ويبدأ فى اخراج الخيط من جيبه فأنقض عليه وامسك بهم جميعاً يبدأوا فى الصياح " ماما.. بابا هياكلنى " واثناء اللعب والمرح يفاجئنى اخوه الصغير يحيى بسؤال اجابته اصعب من تمرين يوم كامل فى صالة الجيم ... بابا مش قولتلنا هفسحكم يوم السبت ؟
طبعا انا لازم اجاوب ..
انا قلت كده يا يحى ؟
ايوه
امتى ؟
السبت اللى فات لما قلتلنا ان ماما تعبانه ومش هينفع نخرج ؟
انا محاولا الهرب من الموقف ...
ايه دا هى ماما كانت تعبانه السبت اللى فات ؟ طب تعالوا لما نطمن عليها
الواد حمزه الكبير ..
بابا هو حضرتك بتحاول تهرب ولا حاجه ؟
طالما عهدته زكى واتنبأ له بمستقبل محترم .. ربيناه على منهجيه فى التفكير تجعله منظم مرتب ومنطقى
بصراحه اه يا حمزه انا بحاول اهرب
طب ما تقول كده بصراحه
انا اسف
هكذا تعودت معه لا اخجل ابداً من اسفى .. طبعا ضحى وإيثار ساكتين ويبدو على وجهيهما الامتعاض الشديد لأنهم مش هيخرجوا ...
مالك يا ضحى ساكته ليه ؟
مفيش
طب وانت يا ايثار ؟
انا عايزه اخرج
طب تيجوا نلعب مصارعه
كلهم فى نفس واحد
ماشى
وتبدأ اللكمات والزغزغه من كل اتجاه ولا يتركونى الا بعد ان ينتصروا علىّ عدة مرات حتى استسلم واعلن انسحابى من المعركه
فى الجانب الاخر زوجتى تنادى
احمد ناولنى صينيه فاضيه عشان انقى الرز
احاول المزاح معها قائلا
طب ما انقيه انا يا حبيبتى
طب ربنا يخليك ياحمد طالما هتنقيه وانت واقف بقى خلى بالك من صينية البطاطس عشان انا هروح انشر الغسيل
ابلع ريقى واقول لها
وماله مانا كده كده واقف متناسيا انى كنت امزح من لحظه واحده
حمزه ويحى عايزينى العب معاهم فيفا على الكمبوتر وانا مش بعرف العبها انا بعرف العب مورتال كومبات ضحى عايزانى احكيلها حدوتة امنا الغوله ... نفسى اعرف ايه المتعه فى حدوتة امنا الغوله من وجهة نظر طفلة فى سنها يبدو ان الثقافه الغربيه اثرت فى نشأة ضحى كيف سأحاول معالجة افكارها
ايثار مازالت تحتفظ بالهدوء الذى اكتسبته من امها ... اشعر وكأنها تنظم ابيات شعريه وهى صامته البنت دى هتكون رسامه هايله .. ومازالت ايضاً تحتفظ بنضارة بشرة امها
وانا مازلت اعتنى بصينية البطاطس
زوجتى تنادى عليا
احمد كلم تليفون احمد البوهى عايزك
اذهب لأكلم صديق العمر والكفاح
احمد يسألنى
ما تيجى نتقابل انهارده يا ابوحميد
معلش يا غالى مش هينفع
يا عم انا ما صدقت خلعت من مراتى انهارده قولتلها سيبينى فى حالى بقا .. هو انت فاكرانى ايه .. مازنجر ؟!! انا بنى ادم من لحم ودم وفى عروق بتنبض فى جتتى وعايز اقابل الواد احمد مهنى
انا وهو نضحك بشده دائما هو كذلك يفعل كل ما يريد بالمزاح انا متاكد من ان زوجته انفجرت من الضحك عندما قال لها تلك الجمله .. وربما تجلس بجواره الان وتضحك
معلش يا احمد بس مشغول والله جدا
بتعمل ايه يعنى
بعمل صينية بطاطس
ننفجر بالضحك مره اخرى ... تنتهى المكالمه على وعد بأن نلتقى غداً ... زوجتى تنادى
يا احمد معلش يا حبيبى هتعبك معايا ممكن تجيب الشنطه اللى فوق الدولاب
ابدأ فى التذمر ولكن لا محاله سوف افعل .. تلك المرأه اسرتنى باخلاقها معى طيلة حياتى انا احبها واحترمها بشده وافتقدها كثيرا حتى انى ما البث ان انفرد بها حتى اختلق حاله من الطفوله وأضع رأسى على رجلها وابتسم وانصت لها واحيانا تأتى هى لى لتضع رأسها على رجلى وتنام وتستغرق فى النوم وانا انظر اليها فقط .. لذلك سوف امتثل لطلبها واطلع فوق الدولاب اجيبلها الشنطه .. الواد يحى عايز يلعب مصارعه تانى وحمزه راح درس القرأن .. ضحى بتحاول تقلد مامتها وهى بتنادى عليا .. ايثار مازالت فى تأملاتها .. صينية البطاطس شكلها اتحرقت
مراتى هتموتنى .. انتهيت من تنقية الارز .. زوجتى تنادى مره اخرى
استيقظت من ذلك الحلم على صوت امى تنادى علىّ لبدأ يوم جديد من العمل الشاق .. مشوار طويل من المطرية للمهندسن كل يوم وبالرغم من انى كنت تعبان جدا فى الحلم الا انى اشتاق الى الواد حمزة ويحى والى ضحى وايثار والى امهم والنونو الجديد اللى فى بطنها .. لو جه ولد هسميه معاذ ولو بنت هسميها مريم هكذا كان اتفاقى معها قبل الزواج انا من سأختار اسماء ابنائى
------------------

هناك 12 تعليقًا:

خمسة فضفضة يقول...

السلام عليكم ورحمة الله وبركاته

ههههه
تصدق افتكرتك بتتكلم بجد

بس طريقتك في السرد حلوه اوي ماشاء الله

*سمر* يقول...

:)

جميلة جدا ..ما شاء الله

ربنا يوفقك وحلمك يبأه حقيقة

غير معرف يقول...

جميلة اوى اوى ..

مش عارفة انا شايفة فيها محاولة لوصف حال الاسرة السعيدة اللى ربتها (الست يعنى) اعده فى البيت..واد ايه هى محققة ذاتها برده وجوزها بيحبها...

والله مش بفتح فى المواضيع القديمة ولا حاجة..يعنى زى ما تقول كده بستزكى :))

قد اكون مخطئة..
بس على العموم هى جميلة جدا

روح شرقيه يقول...

يا ابو حمزه والله انا صدقت وطول ما انا بين كلمات بوستك وانا بحسد مراتك عليك
ههههههههههههههههههههههههههههه
اسلوبك عن جد مجرم حلو مووووووووت
ربنا يحققلك كل اللى بتتمناه
ويكون بطعامه حلمك واحلى كمان
كتير استمتعت بزيارتى دى عندك
ربنا يوقفك للى يرضيه
تحياتى

روح شرقيه يقول...

اسمحلى اسجل اعجابى بشخصك الكريم
بجد مدونتك حلوه جدا جدا
واسمحلى ازور مدونتك باستمرار
انا تصفحت بوستاتك السابقه
بجد لازم اشكرك على المشاعر الجميله اللى حسيتها وانا بين كلماتك
انشالله ديما تكون بخير
تحياتى
anne

R.R يقول...

انا والله عشت جدا القصه دى
انا حتى سالت نفسى ازاى جاب وقت لاربعه اطفال وامهم ولسه عنده وقت يدون
من اجمل الكلمات او العبارات اللى عجبتنى

الجزء الخاص ب
تربية ابنك اللى فى القصه تربيه فكريه سليمه واحترام عقلية الطفل
وطبعا تنقية الرز للزوجه
ده انت هتبقى زوج هايل
:)
اعجبتنى القصه
تحياتى

اهو ده عيبه يقول...

تصدق انا اتلخبطت
وافتكرت الموضوع بجد وقلت يوم الاجازة راح ع الفاضى اتارى كل ده حلم
ان شاء الله ربنا يحقق كل امانيك

واصطنعتك لنفسي يقول...
أزال المؤلف هذا التعليق.
Miss. Sosa يقول...

بجد اسلوبك راقي ورائع وعباراتك رقيقة وسرد متسلسل

همسات دافئه يقول...

صحيت تعبان من حلم ذى ده
امال لو شفت احلامى أنا هتصحى عامل ازاى ههههه
جميل حلمك وجميله أسماء أولادك يارب يارب يارب ياأحمد تحققه وأفرح بيك قريب:)
تحياتى
***********
كلمه الإمام الشافعى مزنوقه مش قادره أسكت
يخاطبنى السفيه بكل قبح
فأكره أن أكون له مجيبا
يزيد سفاهاً فأزيد حلماً
كعود زاده الإحراق طيبا
بس:)

يا مراكبي يقول...

هههههه

طيب واللي خايف تعليقه يتحذف .. يعرف منين إذا كان التعليق في صلب الموضوع وألا لأ؟

ما هو العنوان لوحده بيقول حاجة .. والقصة بتقول حاجة .. والتنويه اللي في آخر البوست بيقول حاجة تانية خالص

بس بجد القصة جميلة وهادية .. فيها إحساس بالراحة فعلا وقدرت تنقله لينا بسلاسة

Rannon يقول...

حلو قوي بجد
مش عارفة امال لو بتسرد حاجة حقيقي كنت كتبتها إزاي؟؟!!
تسلم ايدك بجد