الجمعة، 9 مارس، 2007

حرية ايه يا اسطى ؟

الناس عماله تتكلم عن الحريه ... الحريه .... الحريه
وكل يوم افتح التليفزيون الاقى برامج الناس بتتكلم فيها عن الحريه ... وتمكين المرأة ... وتعديل الدستور ... ونظرية المؤامره ... والاخوان المسلمين .... ورجعوا تانى يتكلموا عن الحجاب ... وبله أزرق ومحدش فاهم حاجه
وبفضل أسأل نفسى هى الناس دى بتتكلم بجد ولا بهزار العالم دى فاضيه ولا جرالهم ايه ... انا بيتهيالى العالم دول لو فاضيين مش هيضيعوا وقتهم كده
حرية ايه ودماغ ايه وتمكين المرأة من ايه انا مش فاهم .. ياعالم الناس مش لاقيه تاكل ... الشعب بيصرخ من الجوع ... سيبوكوا مننا احنا اللى قاعدين عالنت وبنكتب وعندنا كمبيوترات وتلاجات مليانه اكل انا بتكلم عن الناس اللى بتصرخ من الجوع ... الشباب مش لاقى حاجه يعملها غير الضياع ودول بيتكلموا عن تمكين المرأة والحجاب ... مالنا احنا ومال الحجاب ياعم اكلوا الناس وبعدين اتكلموا عن المجارى وهنتكلم معاكوا ... وفروا فرص عمل للشباب واكلوهم عيش وبعدين اشبعوا بالبلد .. احنا ياعم مش عايزين حريه ولا نيله ... الشباب عايز يشتغل ويتجوز وملعون ابو الحريه وأمها... مش عايزين ديمقراطيه ... انا بطالب بديكتاتوريه بس وفروا لكل شاب فرصة عمل محترمه او غير محترمه .. بس خلوا المواطن لما يروح اى مصلحه ميدفعش فلوس عشان مصلحته تمشى .. بس خلوا المواطن لما يشتكى حد يبص فى شكوته .. بس سيبوا كل واحد ياخد حقه من غير كوسه ... بس اضمنوا ان المدن اللى بتتعمل للشباب عشان يتجوز تروحلهم فعلا ومتتباعش من بره لبره ... بس اضمنوا للمواطن انه لو حب يشترى ارض فى الصحراء يعرف ومتطلعش بتاعة فلان او فلان او فلان حتى لو كان فلان دا اسرائيلى ..... احنا مش عايزين غير كده وبعدين تبقى ديكتاتوريه تبقى ملكيه تبقى معفرته البلد باللى فيها مش مهم لكن حرية ايه يا اسطى، حرية ايه ياعم انت وهو وهى ...، حجاب مين يا سيدى ... خلاص البلد مفيهاش مشكلة الا الحجاب مش لاقين حاجه نتكلم عنها الا الحجاب ياعم الحجاب لو مزعلك اعمل نفسك مش شايفه زى الريس بحكمته ما بيعمل ومش بيتدخل فى صغائر الامور وانت كمان اعمل نفسك مش شايفه وبعدين بيتهيألى ان اللى عايز يتكلم عن الحجاب يروح للمفتى لكن هنقعد بقى نفت ونرط ونعجن ملهوش لازمه ... وتمكين المرأه ... تمكين المرأه ... تمكين المرأة لما جالنا صداع ياحضرة مالها المرأة انت عايش فى بلد غير البلد ولا ايه ؟ انا كل ما اسمع كلمة تمكين المرأة دى افتكر الافيه اللى جه فى فيلم مش فاكره لما قال واحد للتانى اللى مش فاكرهم بردو " احنا عايزين حاجه تطرى القاعدة "
مرأة ايه اللى بنتكلم عنها .... انا بصراحه لما بفتح التليفزيون بيجيلى حاله غريبه كده فى منطقه من جسمى وببقى نفسى ادش ام التليفزيون ... دول فضلوا يتكلموا 3 ايام عن الاقباط ورؤيتهم فى تعديل المادة التانيه والمادة دى أصلا مش من ضمن المواد المطلوب تعديلها ... فى أكتر من كده شلل ؟ والله العظيم انا عايز اعرف الناس دى بتتكلم بجد ولا بهزار ولا جنس ملتهم ايه ... انا حاسس إن الشعب واكل تاطوره وعقله فى الباى باى ونفسى اعرف رأيكوا ايه ؟

ثلاثة عشرينات


بعيداً عن اللغه والمصطلحات وعشان اتكلم بلغة العصر " وافك نفسى من لينا " عفواً أصل افك من لينا دا سيم بينى وبين صديقى الصدوق .... وعشان افك نفسى من كل حاجه بتخنقنى هتكلم باللغه الدارجه اللى هى انا بتكلم بيها دلوقتى
طب ايه حكاية التلات عشرينات قالك ان اعمارنا لما بتطول اوى بتقعد تلف وتندن حوالين ال60 سنه اكتر او اقل والستين سنه دول نقدر نقول عليهم 3 عشرينات تخيلوا ان الانسان كل اللى بيعيشهم ( دا لو عاشهم ) 3 عشرينات بس ... يا دوبك عبان ما يخلص التعليم يكون راحت منه 20 ويحس كده انه زى ماتقول خد قفا جامد ... جامد اوى بس القفا دا ماسمعش فى قفاه لأ سمع فى حته تانيه بقى الواحد ياخويا بيضيع عشرين سنه من عمره ميلحقش يقفش منهم حاجه غير شهادة بيتهيالى انها بتدل على جهله مش على انه متعلم شهادة بتدل على انه خلص تعليم بس مش هيعمل بيه حاجه دا لو كان فاكر منه حاجه انا اقدر اراهن اى حد ان كان فاكر اسامى المواد بتاعة اولى كليه بعد ما اتخرج ناهيك بقى عن ثانوى واعدادى أيه ناهيك دى احنا مش اتفقنا هنتكلم دارج المهم يعنى الواحد ميلحقش يفوق من اول قفا يلقى بعد كده نفسه فى الجيش وبعدين يدور على شغل لما يطلع انفاس اللى جايبينه سيبوكوا من الناس اللى زى اللى اهلها بيشغلوها لما يتخرجوا انا بتكلم على كل الناس و هوب وعينك ماتشوف الا النور عبان ما يكون نفسه للجواز ... يكون دخل فى العشرين التالته ... طب والتانيه يا عالم والتانيه يا هوووه
... انسى تانية مين ياعم يدوبك تلحق ... المهم يتجوز ويصرف ويخلف وطبعا انتوا عارفين ان الواحد وهو فى التالته بيبدأ ينخ الركب والظهر والكوع والنظر والكلى و..........................
وهوب وعينك ما تشوف الا النور فتح عينك تاكل ملبن العيال بتتجوز والست هكعت وعايزه حد يشيلها والبيت عايز يترمم وهوب العشرين التالته خلصت ... مع السلامه ربنا يوفقك بقى مع حبايبك بتوع زمـــــان اللى من سنك وملحقوش غير عشرين واحده او اتنين ... اديك حصلتهم ... بقى يا عالم الواحد يعيش 3 عشرينات ميلحقش يشوف فيهم عشرين كده نضيفه او حتى عشره او اقل معقول الواحد يعيش 3 عشرينات واحده منهم فى التعليم عشان يتخرج لا مؤاخذه حمار ولازم اى سى دى ال وتويفل وبله ازرق ودورات وتقدير ودرجه علميه امال تعليم ايه اللى بتتعلموه ... طب بلاش ... التعليم حلو وجميل انا غلطان انا مش فاهم طب الواحد يضيع عشرين من التلاته فى التعليم الحلو وفى الاخر بردو يخرج عشان يعزق فى نفس الساقيه بتاعة العشرينتين التانين .. مش ممكن تكون دى حياة بنى ادم حتى لو كان مستريح فى ال3 عشرينات ... دى ممكن تكون قصة قطة كلب لكن بنى ادم لأ
بيتهيألى البنى أدم لازم يكون عنده رساله طول العشرينات وإلا يبقى فعلا حمار على فكره انا مش هعلم عيالى هو اخرهم قوى ابتدائى انا مش عايزهم يخشوا فى دايرة العقم دى مع احترامى للناس المحترمين من العلماء بس بيتهيألى ابنى احسنله يثقف نفسه ثقافه عامه ويشتغل قبل ما يلاقى القفا معلم على ..... ولا بلاش

الأربعاء، 7 مارس، 2007

النشيد الوطنى

الرئيس السادات ربنا يارب يرحمه ويفشفش التوبه اللى تحت راسه ومع احترامى الشديد لعقليته وبراعته الشديده التى أستشهد بها الان ؛
النشيد الوطنى الرسمى لمصر كان " والله زمان يا سلاحى الاغنيه الشهيرة من كلمات صلاح جاهين واعتقد انه مفهوم ماكان يشير اليه النشيد من معنى خلى السلاح صاحى ... وبعد فترة كده وبقدرة قادر الشعب صحى من النوم الصبح لقى النشيد الوطنى بقى بلادى بلادى ياعم ايه اللى جرى طب ايه اللى حصل ... مفيش محدش بيرد المهم الشعب اقتنع ان النشيد الجديد حلو او لازم يكون حلو عشان الريس عارف مصلحة البلد اكتر وهوب وبعد شويه اتغيرت وزارة الحربيه وبقى اسمها وزارة الدفاع ... طب ايه اللى حصل وايه اللى جرى بس بردو الشعب كان لازم يقتنع ان الريس عارف مصلحة البلد اكتر منهم المهم وعينك ماتشوف الا النور كل شويه يحصل حوار زى كده اتارى بقى كامب ديفد كانت اتعملت وكنا داخلين على حوار سلام وموضوع كبير اوى ... فكان لازم والله زمان يا سلاحى تتسخط وتبقى بلادى بلادى
السؤال هنا لو حبينا اننا نغير النشيد الوطنى بتاعنا الحالى تفتكروا نخليه ايه ؟
يا ترى اغنية خبينى لمصطفى قمر ... ولا انا مصرى لنانسى ... ولا انا بكره إسرائيل
اقولكوا ياريت كل واحد يقول هو نفسه النشيد الوطنى يبقى ايه ؟
بس انا نفسى يرجع والله زمان يا سلاحى