الخميس، 10 أبريل 2008

رسم تجريدى


أنا بين ضلوع الشمس ساكن من سنين
معرفش غير النيل
وصرخة شيخ بيندهلى
فى حسه أنيـــــــــــــــــــــــن
وبسمة طفل محفوره
ما بين وجدانه شوق وحنين
وحلم سجيـــــــــــــــن
وناس عايشه بتتنهد
وناس مســــــــــاكين
ـــــــــــــــــــــــــــــــــــــــــــــــــــــــــــــــــ
2
ما بلاش تتحمل أكتر من تراتيل الصمت فى الحانك
أنا عارف انك لسه شجاع
لكن مغرور
أو جايز انك مستعجل
يمكن مبهــــــــــــــــــــور
انا عارف انك طيب جدا
أيامك بتمرفى ساعه
وساعاتك أيامها كتير
وحنينك لسه لوحده أسير
والناس فاكراك من جوه ملاك
وملاك الناس فى عيونها كبير
واكمنك نفسك تبقى ملاك
تلاقيك محتار
والناس بتحاسبك على انك من جوه ملاك
إنسان محبوس جواك
بيحاول يصرخ ويقول انا زى الناس انسان
وحنيـــــــــــــــــــــن
وسنيـــــــــــــــــــــن
ودموع مكبوته فى قلب حزين
انا عارف انك لسه شجاع .. وضعيف
أصلك انسان
ــــــــــــــــــــــــــــــــــــــــــــــــــــــــــــــــ
3
إقتل خوفك
حرر كل معانى حروفك
فكر حبه فى نفسك جايز
يقوى الحلم
عافر ويا ظنونك جايز
تقتل وهم
لم دروعك
فك سيوفك
واقتل خوف الناس م الظلمه
واعمل مركب
حط عليها كلوب وغنى
أنا مستنى
عدى البحر لوحدك حتى
مش هتحرك
انا مستنى
ـــــــــــــــــــــــــــــــــــــــــــــــــــــــ
4
بتموت فى عيون الناس المبهوره
وتمـــــــــــــــــــــــــــــــــــوت
وتعدى عليك ايام وتفوت
أنا فاكرك انك فعلاً شيخ
ولقيت الدقن بتتركب
ولقيت الصبغه البيضه المركونه فى دماغ الناس
ولقيت احساس بيقول انك
بتحاول لكن فيه احساس
وكأنك مخنوق
وكأنك مخدوع وبتتأمل
حيران
والحيره شيطان
وكأنك صوره ملعونه لخيال انسان
وكأنك ظل لحدوته
عن طفل وديع وحصله جنان
كان نفسه يكون مشهور
واهو بقى مشهور
لكن حيران
ـــــــــــــــــــــــــــــــــــــــــــ
5
غير شرايينك
واهتف لما الظلمه تموت
اهتف او صوّت ولا اصرخ
او حتى تموت
مش فارقه معاك
ولا ينفع حتى انين الناس وياك
خليك قاسى لو حتى يومين
حاول تتمرد على اى حنين
ملعونه الضحكه المسروقه
ملعونه وشوش الناس الكدابه
ملعون احساس الخوف جواك
غير شرايينك
غير طعم الحلم
واقتل احاسيس الضعف المطويه
والمسكونه على شكل حنين
واصرخ او صوّت او حتى تموت
ايامك فايته ومعدوده
خليها تفوت
ــــــــــــــــــــــــــــــــــــــــــــــــــــــــ
خمس رسوم تجريديه رسمتها بنفسى والسادسه منقوله من كتاب ذاكرة النخيل للشاعر فراج مطاوع بعنوان مصباح
كم كنت أحسب ان ضوئى لا يضاهىَ
أهدى نعال الخلق
فى ليل السكك
وأظل سهرانا امام البيت
تمتنع الذئاب ويقبل العسس/الفراش
يطفن حولى .. أبتهج
فى ليلةٍ
نسى الصديق الزرَّ
لم أطفأ
وعشت الى صباحٍ مبهرٍ
فرأيت نور الشمس أول مرةٍ
وذهلت من جهل الزجاج
عرفت أن الليل
يمنحنى
الجلوس على عروش ممالكه
(طريد ضوئى )
وعرفت قدرى بين عمدان الشوراع
ـ
ـــــــــــــــــــــــــــــــــــــــــــــــــــــــــــــــــ
بيموت الضعف فى قلبى وانا حابب انه يظل تملى ضعيف
احمد مهنى

هناك 18 تعليقًا:

عصفور المدينة يقول...

رائع


انا عارف انك طيب جدا


وحتسامحني وتدعي لي

واصطنعتك لنفسي يقول...
أزال المؤلف هذا التعليق.
ا بـن عــمــر يقول...

احساس رائع
أعتذر عن عدم متابعتى لمدونتك
فقد كنت بحق مشغول

حزيــــــــــــــــــن يقول...

عصفور المدينه
اكيد مسامحك من غير ما تطلب بس على ايه وربنا يكرمك

الفاضله ايمان
ربنا يبارك فى حضرتك وفى تعليقاتك العميقه المتأمله
كررى ما تشائى واقتبسى ما تشائى ولا تشكرينى .. فقط اسألك الدعاء
بالنسبه لجملتى الاخيره فأن يكون القلب ضعيفا خيرا من ان يكون قاسيا

ابن عمر
اهلا بك دائما وجزاك الله خيرا

rona يقول...

بجد رائعه ليها
تأثير فى النفس قوى

عاشــــــ النقاب ـقــــة"نونو" يقول...

انا كمان عاوزة اصرخ واقول انا زي الناس انسان
الله يبارك في احساسك
بس نفسي تبقى سعيد بقى
ربنا يكرمك يارب
تححياتي

د/اجدع بنوته يقول...

هيييك التجريدى والا فلااا

تانى رسمه عجبتنى جدااا

بجد هايلللل

انتو بتكتبوا الحجات دى ازاى ياجدعان

بحقددددددددد عليكم

انكسارات .. احمد البوهى يقول...

3
إقتل خوفك
حرر كل معانى حروفك
فكر حبه فى نفسك جايز
يقوى الحلم
عافر ويا ظنونك جايز
تقتل وهم
لم دروعك
فك سيوفك
واقتل خوف الناس م الظلمه
واعمل مركب
حط عليها كلوب وغنى
أنا مستنى
عدى البحر لوحدك حتى
مش هتحرك
انا مستنى


ــــــــــــ
هحاول على قد ماهقدر
احلم يمكن حلما يكبر
يمكن افتح برجل رجلى
يمكن توسع كل دوايرى
يمكن اكتر
مش راح اقول هستنى المركب ترسى فى اقرب بر واقرر
من دلوقتى هحاول اعبر
للاحلام واحلم واتمنى
وكل مانحلم نحلم تانى
ماتضيعش الوقت فى وقتى ولا تستنى
لازم نحلم نوصل مرة
لازم نقدر نعمل حاجة

ـــــــ

حلم .... مدونات مصرية للجيب
ــ
موقع الجروب عالفيس بوك

*سمر* يقول...

كلماتك اكثر من رائعة ..
ما شاء الله ..
دمت مبدعا

*سمر* يقول...

استاذنك ...انا طبعت التدوينة دى علشان اعرف اقراها كتييير ...

بجد لو ده يضايقك ...يا ريت تقولى

غير معرف يقول...

يعنى بجد بجد بجد خس صور رااااااااااائعة كلام حقا خارج من القلب ووصل إلى القلب
بارك الله فيك وفتح عليك من فتحه


moslemes forever

امل يقول...

مش عارفه اقول ايه
كلامك كله جميل

MKSARAT - SAYED SAAD يقول...

احمد مهنى
وحشتنى مدونتك قوى بس انت اكتر
ايه اخبارك
مش قادر اوصفلك مدى اعجاب ومش ههزود فيع علشان متقولشي انى مجاملك
انت فعلا موهوب ربنا يوفقك
انت الاسلوب اللي كتبت بيه
من الاساليب اللي فعلا بحبها
مش عارف اوفهولك بالظبط لنه احساس بالنسبة ليا مختلف شويه اوقات مش ببقى قادر اعبر عنه كويس
لكنى مبسوط
مجموعة عبارت مصاغة بطريقة فعلا فنية
حققت فكره جميله
دمت بكل ود
سيد سعد

عين ضيقة يقول...

مممممممممم

المقطع التانى كويس جدا على فكرة

بس بجد بقى بلاش تجرى ورا القافية لأنها خنقتنى بجد


أحسنت ياشاعر

Mony The Angel يقول...

ya laaahhhwyyyyy :|

ana awl mara agy hna
bas akeed msh hatb2a al a5eera :|

"بيموت الضعف فى قلبى وانا حابب انه يظل تملى ضعيف"

gamda a5er haga bgad!

Mony The Angel يقول...

aah btw..
alsoora bta3t al profile bta3ak,
3abqariia b ma3na alkalma
hia ally 5altny ad5ol aslan :))

حاجات جوايا يقول...

رسوم جميلة جدااااا يا فنان

سلمت يدك
دمت بخير
سالى

shaimaa samir يقول...

رهيييييييييييييييييييييييييييبة
انا لا احب العامية بقوة
ولكنى بصدق استمتعت
وفكرت

جزاكم الله خيرااااااااااا