الثلاثاء، 25 ديسمبر 2007

أنا راجع


إقتلى فيّا الدموع
وإخلقى فيا الرجوع
عيشينى بنبض شاعر
بين شوارعك والنجوع
مدى نيلك جوه قلبى بالحنان
إمسحى الاحزان مع الازمان كمان
مدى ايدك جوه شعرى
حطى نفسك بين مشاعرى
طبطبى على ظهرى يمكن
يتولد بينا المكان
مصر ياأما
إقتلى فيا اللى فات
واقتلى فيا الممات
بكره حزرع سنبله فى كل الربوع
إسمعينى ... كلمينى
ولعى بإيدى الشمــــــــــــــــــــوع
كلماتى /احمد مهنى

هناك 21 تعليقًا:

huda gamal يقول...

البوست ده واللى فات قرأتهم كذا مره...
ومع ذلك ما بشعرش بالملل،
ليهم نفس التأثير الجميل كل مره..
دى فى حد ذاته موهبه مش عند كل اللى عندهم ملكة الكتابه..
كلمات جميله تمس القلب لا تفقد بريقها بمرور الوقت
....
بس بردو فى انتظار الجديد
تقبل تحياتى

الزهراء يقول...

بسم الله مشاء الله

انا بمسك الخشب :D

كلام حضرتك جمييل جدا
وفعلا ماحستش بالملل زي ما هدي قالت :)





بورك قلمك :)

reri يقول...

أول مره أزور المدونه
عجبني النشيد جدا
أما البوست
فجميل أوي
يا ريت يا مصر ترجعي

سلامي ليك

امام الجيل يقول...

ايه الكلام الكبير ده اوعى يكون كلامك يبقى قنبلة
ماشاء الله بجد رائع جدا

واحدة من الناس يقول...

مدى ايدك جوه شعرى
حطى نفسك بين مشاعرى
______________
تحفه الجمله ده
بوستك جميل بجد
أحييك وسامحنى على التأخير مش هاعمل كده تانى:))
تحياتى
شيماء

مدونه انا بحبك يا مصر يقول...

بجد لو طلع الشعر دة شعرك مش شعر واحد كبير بل اكبر الشعراء ابقه انا غلطان
ربنا يبركلك
احمد الجيزاوى

sokoothansawat يقول...

أنا جيت ارد الزيارة,,لكن ما كنتش اعرف اني هخرج مدمعة كده...ايه الكلام الرائع ده..ده انا شكلي هبلط هنا ولا ايه...كلام اكثر من رائع سلمت يمينك...

ibn nasser - ابن ناصر يقول...

جميل جدا جدا
بص في البداية
بعد ما شفت المدونة دي لازم نتقابل

تحياتي

حزيــــــــــــــــــن يقول...

اختى هدى
تسعدنى زيارتك دائماً... لا اسكت الله لك حسا ولا قطع لك خبرا واعتبرى مدونتى بتاعتك علقى على اى حاجه وردى على اى حد وكمان اللى ميعجبكيش قوليلى عليه

----------------------------
الزهراء
ربنا يكرمك انا شاعر غلبان على قدى بس يا ريت لو كان فى لينك ليكى عشان ارد الزياره
-----------------------------
ريرى
نورتى مدونتى يا ريت متقطعيش الاخبار
-----------------------------
امام الجيل
طبعا كلامى امال كلام مين
زيارتك ليا شرف اتمنى متغيبش عليا
------------------------------
شيماء واحده من الناس
ياااااااااااه نورتينى انا فاكر اول مره علقتى عندى ومن ساعتها مجيتيش وانا هكون منتظر تعليقاتك باستمرار
--------------------------
اخويا الجيزاوى
نورتنى ومش شاعر كبير ولا حاجه انا ياعم شاعر متواضع
متشكر على مجاملتك
جزاك الله خيرا
--------------------------
سكوت هنصوت
انا سعيد بتلبية الدعوه انا اسف لو كانت عينك دمعت بس بيتهيألى انها كانت دموع راحه نفسيه انا بردو اول ما كتبتها وقرأتها اول مره دمعت اوى
والمدونه تحت امرك اعدى فيها زى مانتى عايزه
---------------------------
ابن ناصر متشكر على تلبية الدعوه يا غالى وان شاء الله نتقابل شوف تحب نتاقبل ازاى

Carol يقول...

حب فات
حب مات
حب يتولد يوماتي
و بعد ما تعدي الساعات
يرجع ثاني بين الشوق و السلامات

بتمرجحينا
بتنادينا
ترتسم ضحكة في عنينا
نغني غنوة تنتهى دايما بآهات

المجاهدة يقول...

الطريقة جميلة اوى ماشاء الله :)
طبطبى على ظهرى يمكن
يتولد بينا المكان



واقتلى فيا الممات
بكره حزرع سنبله فى كل الربوع


عجبوني اوى دول ماشاء الله :)

ربنا يبارك في موهبتك

اه يا دماغى يقول...

احلى ما فى مدونتك

البساطة وعدم الإطالة

خالص تحياتى

مدونه انا بحبك يا مصر يقول...

الاخوة والاخوات المدونين وغير المدونين يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل (الوصف بلدى : تركب حاجه الى الملك الصالح ثم تسئل عن سينما فاتن حمامه الشارع الذى على نصيته سينما فاتن حمامه امشى فيه حتى شارع باهر زغلول هو تقريبا 5 او 6 شارع على الشمال ) ونشكر بهذة المناسبه المركز العربى للدرسات من اجل اسضافه اجتماع المدونين
والدعوة متاحه لكل المدونين و كل الافكار السياسيه بلا استثناء وكل المهتم بمدونين وكل شخص يمكن ان يفيد التجربه وكل شخص يريد ان يعرف فكرة اكثر عن التجربه المدونين وكل شخص موافق على الفكرة وكل شخص معترض على الفكرة وكل شخص عوز يجب شخص لا يوجد مشاكل

الدعوة عامه
الاستفسار
0109825523
احمد الجيزاوى
http://iloveyouegypt.blogspot.com/

Monzer يقول...

غاية فى الروعة والجمال

جميلة جدا وساحرة

جزاكم الله كل خير

وفيه موضوع آخر أريد تضامنك معنا، وأريد مجهودك فيه ان شاء الله

وهو المدون خانة كما تفضل صديقى الجيزاوى

Monzer يقول...

والموضع الىخر الذى أريد مساهمتكفيه هو
آسف على أن تعليقى خارج الموضوع ، وأرجو ان تغفر لى ذلك

ولكن ما يعوض ذلك

ثقتنا الكاملة فى وطنيتكم وحرصكم على سلامة شباب الامة
ندعوكم للانضمام فى حملة افضح تجار الكيف
وهي تهدف إلى تقديم كل ما تعرفه من معلومات عن من يقومون ببيع هذه السموم سواء كانوا فى منطقة إقامتك أوعملك أودراستك أو ناديك

http://elbawaba.blogspot.com/

والتفاصيل والبانارات على هذا الرابط

وجزاكم الله كل خير

بحبك يا مصر يقول...

مدى نيلك جوه قلبى بالحنان

حطى نفسك بين مشاعرى

مش محتاج أقول رأيى

ألف مبروك على النجاح يا شاعر،أبقى عدى عليه كده

sendbad يقول...

جميل اوي اختيارك
تحياتي الشديدة

Reemo يقول...

جميل الكلام يا حزين
معلش مقصره فى زيارتك شويه
متزعلش منى
وكمان انت لينك مدونتك موجود عندى زى ماهو انا مشيلتوش
انت بس تلاقيك مش اخدت بالك
ربنا يكرمك يارب
تحياتى

alqassam يقول...

تقدر حضرتك تدخل على الرابط دة وتشوف الكليب

ملتقى المناضلون
http://alqassam-film.blogspot.com/


http://m-monadelon.blogspot.com/
سلامى

Monzer يقول...

ألف مبروك يا باشا
وعقبال الدراسات العليا الماجستير والدكتوراه

صاحب البوابــة يقول...

نتمنى منكم دعمنا في حملة ( افضحوا تجار الكيف )

التفاصيل في مدونتي