الخميس، 19 يوليو 2007

مزاج... وعيش






إضرب مـــــــزاج
إعمل مـــــــــــزاج

إمسك مزاجك مزّجه وإتمزّجه

وإمزج ما بينه وبين مزاج الشعب

والناس الغلابه

ومـــد صيتك لعـــــلو بيتك

وأصرخ وقول الناس ديابه

ومن غير مؤاخذه و سين و جيم

وكلام نيابه

طيّر مزاجك فى الهوا

بجنـــــاح وريش

إصرخ ونادى فى الجوامع والكنايس

إهتف يعيش

إعمل دماغ

وانسى الهموم

واضرب حشيش

مفيش فى بلدك غير "مفيش" ـ

حاول تعيش من غير "مفيش"ـ

هتلاقى ايه من غير "مفيش"ـ

مفيش فساد ؟!!!مفيش عناد ؟!!!ـ

مفيش تربص ؟!!! مفيش كساد ؟!!!ـ

مفيش حشيش ؟!!!ـ

يا عم قوم واضرب حشيش

واضرب مزاج واعمل مزاج

ومتنقهرش ومتنجرحش

ومتنتشيش

الدمعه ساكنه فى العيون

مقفول عليها بإزاز وشيش

والشعب نايم من زمان

مات الكلام

تعظيم سلام

إبسط وعيش

وإسكت وعيش

متقولش كلمه من هناك

متجيبش فكره من هنا

ولا من هنا

متجيش تبرطم عندنا

راح نضربك ولا ننعرفش

والميه تبقى فى قلب جوفك ولا ترتويش

عظم سلام

بلاش كلام

شوف اكل عيشك

وارجع لبيتك

وبعلو صوتك

إهتف يعيش

وإضرب مزاج

وإعمل مزاج

وإمسك مزاجك مزّجه وإتمزّجه

وامزج مابينه وبين مزاج الشعب والناس الغلابه

وأصرخ وقول الناس ديابه

والدوله حلوه مفيهاش "مفيش"ـ

إهتف يعيش

وإبسط ومزج واسكت وعيش
كلماتى/ احمد مهنى
تزييل : هذا النوع من الشعر يندرج تحت مسمى الشعر الحلمنتيشى وهو مش زجل ولا شعر عامى ولكن اتجاه من الشعر كان اخترعه بيرم التونسى ومشى على نهجه ناس كتير اشهرهم احمد فؤاد نجم وان كان تميز نجم باسلوب خاص وانا بصراحه مكنتش بكتب النوع دا بس ليا فيه شوية محاولات وعايز رأيكوا وفى كل الاحوال احنا محتاجين احمد فؤاد نجم جديد بس انا مش هقدر اكون هوا

هناك 7 تعليقات:

قلمي الحر يقول...

بداية موفقة ..استمر انا كمان مش بحب اكتب حلمنتشي
لكنه مش وحش وحلو وبأثر في الناس
استمر وإن شاء الله تكون بداية كويسة

الحلم العربي يقول...

حلو جدااااااااجداااااااجداااااااا
بجد رائعة
أنا بقى بحب الشعر الحلمنتيشي مادام معبر عن الحالة اللى فيها ناس كتير
مايهمنيش الوزن و القافية المهم الفايدة و المضمون
بجد جميل جدا
و انت كمان كاتبه بطريقة مرتبة و فيها احساس و ذوق

تحياتي و إلى الأمام

huda gamal يقول...

اولا : حمد الله على السلامه

ثانيا :
حلو اوى ماشاء الله الشعر الحلمنتيشى ده عجبنى فعلا ..
الابيات دى عجبتنى اوى :
مفيش فى بلدك غير "مفيش" ـ
حاول تعيش من غير "مفيش"ـ
هتلاقى ايه من غير "مفيش"ـ
مفيش فساد ؟!!!مفيش عناد ؟!!!ـ
مفيش تربص ؟!!! مفيش كساد ؟!!!ـ
مفيش حشيش ؟!!!ـ

الدمعه ساكنه فى العيون
مقفول عليها بإزاز وشيش
والشعب نايم من زمان
مات الكلام
تعظيم سلام
إبسط وعيش
وإسكت وعيش

والكلام كله عموما رائع ،
بجد يجى منك فى الشعر الحلمنتيشى :)
والى المام دائما

زهراء يقول...

انا بحب الشعر الحلمنتيشي جدا

حتي اسمه (الحلمنتيشي )جمييل :D

وممكن حضرتك تكون احمد فؤاد نجم جديد :D

استمر في الكتابه


وبورك قلمك

alqassam يقول...

انا مليش فى الشعر خالص والله بس لما قرات الشعر دوت بجد رائع جدا واستمر والى القمة اخى باذن الله

Rasha يقول...

حلوة جداااا وياريت تعملها تاني
انا بحب الكلام الحلمنتيشي اوي عشان كلام حر مش ممسوك باي حاجه زي الوزن او القافيه
بحس انه كلام بيتنفس هوا
اختك الكبيرة اللي لسه ناسيها

:: سبارتكوس :: يقول...

جميل جدا ...ومش بس كده
انا اعتقد ان ده نص النصائح اللى بتقدمها الحكومة للشعب المصرى
ولولا الكسوف كانوا عملوا غرامة عاللى يخالف القوانين دى

الله يعينك