الجمعة، 7 أغسطس، 2009

إنتى وأنا

ـ
إنتى وأنا قلبين ورق
بيحبوا بعض
ماسكين فى بعض
لكن ورقتى مسطره
سطريــن وسطر
وكل سطر عليه ســــؤال
جايز تكونى بتندمى فــوق الاحتمال
جايز تكونى بتحلمى تتبسمى
أو تحلمى تتعلمى .. تتكلمى
أو يرجع القلب المسطر يندهك
أو يرسمك فوق ورقة بيضا من جديد
أنا قلبى طاهر مش انانى
لكن ورق بيطير بعيد
لو تندمى راح يحزن السطر الاخير
والسطر دا أنا سايبه فاضى للزمن
وكل سطر عليه سؤال
فاكره الكلام عن امهاتنا وجدنا ؟
لسه الكلام بيهزنا ؟؟؟
ولا اللى فاضل مننا
تدوينة واحده وتعليقات
وكلام كتير وايميل وشات
ومكالمتين
وزياره تايهه فى بيت حزين
لسه الفراوله بتعجبك ؟ :)
لسه الحنين بيعذبك ؟
لسه الشتا نفس الشتا ؟
أنا بعتذر وبلاش دموع
مفيش رجوع لكن وجع
يمكن شجن
يمكن حنين
يمكن سكــــوت
لو تسكتى جايز هعـــيش
لو تصرخى يمكن أموت
اتكلمى
اتبسمى
قلبك ورق أبيض بيضوى
مفيهوش سطور
ليه تحزنى على قلب سطره
مليان كلام
كراستى كـــِـــنزه صغيرة
ودى قسمتى
ميضركيش لو تحلمى بكشكول كبير
يمكن يكون سطره الاخير
مليان فضا

إنتى وانا
بطعم الزمن
لايقين لبعض
لكن خريفك فيه مطر
وخريفى تايه فى الشتا
أرجوك تبتسمى بقى
وبلاش دموع
هو الفراق بيجيب رجوع ؟ ؟ !!! ؟
خلى اللى فاضل مننا
حبة نهار
بكره النهار هيعلمك
هيكلمك
وهيخلق الطعم اللى تايه وسطنا
لمى اللى فاضل مننا وشدى القلوع
فى قلب فاضى بدون سطور
واقف هناك بيبصلك
لكن ورقتى مسطره
وكل سطر عليه سفر وعليه سؤال

---
أحمد مهنى

هناك 21 تعليقًا:

حلم الحرية يقول...

انا كنت سعيدة جداا اني جيت بدري واني هاكون اول تعليق

بس بجد لما جيت اكتب ملقتش كلام اعلق بيه

فقط

دمـــت مبدعا

فاتيما يقول...

يا احمد يا عزيزى
الله يخربيت الكشاكيل الكبير اللى واقفة فاضية بعيد دى ومستنية تاخد مكان صفحاتك الجميلة المليانة سطور رقيقة ...
و يخربيت كل حاجة بتيجى تقف زى السد قصاد جريان نهر الحب البرىء و تقتل الحياة فيه
حلوة قوى
و حسيتها قوى
و يا ريت متكونش حقيقية قوى
إنت و سلامة و مهنى اوقات تخضونى كدا وتبهرونى بموهبتكم و صفاءو صدق إحساسكم
سلامى و تحياتى و خالص ودى

نـــــــــــــور يقول...

ماشاء الله عليك يااستاذ احمد

جميله اوى اوى بجد

حاسه فيها بساطه ملهاش حدود

سكوت هنصوت يقول...

الله الله الله الله الله الله

ايه الحلاوة دي

قصيدة تغني والله....طب والله كنت سامعة اللحن في ودني وانا بقرا

رائعة يا احمد رااااائعة

اغنية تنفع لعلي الحجاب ومحمد منير ومدحت صالح

الله على مدحت صالح لو غناها

بجد هاييييييييلة

bobos يقول...

gamila gedan we rabna ywfak

bobos يقول...

allah ehssak gamil gedn
we rabna yofak

انكسارات .. احمد البوهى يقول...

دائما ما تحمل كتابات من الفكرة والفكر ما يثير العقل
وتحمل من الاحساس ما يميزها بعمق الاثر
ــ
دمت مؤثرا
:)

آه من قلبي يقول...

لو أوي
ما شاء الله
دمت مبدعاً
ممكن تزرو مدونتي
أنا لسة جديدة

يا مراكبي يقول...

طبعا أنا قريت القصيدة المبدعة دي قبل كده عالفيس بوك وإتأثرت بيها جدا بجد

كفاية العنوان الحالم الناعم الجميل .. رغم الحزن اللي جوة القصيدة

المهم .. أحب أفكرك إننا مدونين .. يعني لازم تهتم بنشر الإبداع هنا أكتر من الفيس بوك .. لأن الفيس بوك مغلق على الأصدقاء اللي إنت محددهم .. لكن المدونة هي إبداع معروض للجميع وللإطلاع الواسع في أي وقت

Sharm يقول...

بحب اوي لما اقرأ كلام جديد له اثر داخلي

Sharm يقول...

جميلة والله

عاشقه وغلبانه يقول...

ايه ده انا جيت هنا ازاي
مش قادره اقول جميل اوي
ولا اقولك اني عيطت لما شبعت
ولا اقولك اني بحب الاسلوب ده في الكتابه
اول زياره ليك وبجد مبدع
وعجبتني اوي قصيدتك عند فاتيما وصممت اقرالك غيرها

د. ياسر عمر عبد الفتاح يقول...

إيه الروعة دي
إيه الجمال ده

بجد تسلم إيدك
جميل فعلاً

L.G. يقول...

جميلة بس تهت منك طبعا فهمت مجمل الحكاية بس فيه أفكار جرت مني
انت عندك السطر رمز لإيه ؟؟؟
لو تندمي راح يحزن السطر الأخير ؟؟؟تقصد بيها ايه
على فكرة أغلب الولاد بيستهبلوا ويتركوا قصة حبهم على اعتبار انه يا عيني يا حرام ضحية الظروف والبنت مستنية كشكول

الكلام ده استهبال ليه الشاب ميحاولش ويكافح ويتجوز بأقل الامكانيات ولما البنت ترجع في كلامها تبقى غلطانة

ما علينا
كراسة كشكول أهو كله عالم ورق :)))
رمضان كريم

صمت المشاعر يقول...

بجد برااااااااااااااااااافو

كلمات واسلوب فوق الرائع

دمت بكل خير

Carol يقول...

حلوة قوي
بترسم على الشفايف بسمه من حلاوة الكلام
و تسيب أثر حنين و وجع من اللي في باطن الكلام 

yasser esmail يقول...

جد مدونتك جميله جدا

وياريت نعمل تبادل لينكات مع بعض

انا مدونتى \عن الفوتوشوب

http://psd-design.blogspot.com

ياريت تشرفنى وتعمل تعليق ترد فيه على طلبى ده

او لو تحب تبعتلى ايميل

yasseresmailactor@gmail.com

ومدونتك من غير اى حاجه جميله جداااااا

حـــلـــم كــــان يقول...

بجد كلامك تحفه

وعجبنى اوى


اول زياره بس بجد اتبسط

محمد الجرايحى يقول...

أخى الفاضل: أحمد مهنى
السلام عليكم ورحمة الله وبركاته
أحيي طرحك الراقى ..والذى رغم بساطة كلماته يحمل مشاعر رقيقة ..وعميقة
تقبل مرورى وتقديرى واحترامى
أخوك
محمد

الدرعمي يقول...

يا خبر أبيض !!!

إيه اللي انت كاتبه ده ؟؟


؟؟؟؟




؟؟؟ ؟؟؟؟؟؟؟

Eman Eltaher يقول...

جايز تكونى بتحلمى تتبسمى
أو تحلمى تتعلمى .. تتكلمى
أو يرجع القلب المسطر يندهك
أو يرسمك فوق ورقة بيضا من جديد
أنا قلبى طاهر مش انانى
لكن ورق بيطير بعيد
********************
ما شاء الله ايه الإبداع دة
بجد جميلة فوق الوصف
انا اتأثرت جدا القصيدة ملهاش حل
على قد بساطتها على قد ما لمستنا اوى

دمت مبدعا
وربنا يديم قلمك