الجمعة، 10 أكتوبر 2008

البقـــــــــــاء لله

أنا عاوز أقولكم خبر مؤلم وتعبني قوي ومش مصدقه لحد دلوقتي و بأتمني أكون بأحلم توفي إلي رحمة الله أخويا و حبيبي أحمد مهنى صاحب مدونة مزاج دعواتكم له بالرحمة وأن الله ينير قبره بالقرأن و يدخله فسيح جناته
-
-
-
-
-
دى الكلمات اللى متوقع ان احمد البوهى هيكتبها على مدونته هو والصباغ والغزالى ومفيد ومصطفى الحسينى ومنذر .. معرفش هما هيكتبوا صديقى واخويا وحبيبى احمد مهنى ولاً هيكتبوا زميلنا المدون احمد مهنى
فى الحقيقه السؤال دا تردد على ذهنى من ساعة ما توفت المدونة شيماء من فتره طويله والناس عرفت عن طريق ان اخوها كتب تعليق فى مدونتها وقال انها ماتت .. مكنتش عارف انا لما اموت زمايلى اللى عرفتهم من التدوين هيعرفوا ازاى .. اديت الباسوورد للبوهى هو هيبقى يدخل يكتب بقى ساعتها .. لكن السؤال التانى هل الموت لوحده يكفى ؟ وهل موتى هيأثر على حد من الناس اللى عرفتهم من التدوين .. يا ترى وفاتى فجأه ممكن يكون ليها انطباع مختلف عند حد منكم ؟ بالتأكيد مشروع مدونات مصرية للجيب هيستمر لأنه غير متمثل فى شخصى اكيد البوهى وفريق العمل هيكملوا واكيد فى ناس جديده هيعملوا مدونات وناس هتكتب حاجات اى كلام فى المدونات وناس هتكتب حاجات قيمه وهتستمر الحياة .. لكن انا بشكل شخصى هل هكون تركت اثر ؟ يمكن علاقاتى بالمدونين اللى عرفتهم من فتره طويله استمرت وتحولت الى صداقه وطيده لدرجه لم اكن اتخيلها

يمكن محدش يفتكرنى خالص .. يمكن مفيد ومنذر والحسينى والصباغ ومحمد جمعه والبوهى وسلامه وهشام واشرف توفيق وغيرهم يمكن ميكتبوش النعى السابق ولا حتى يعلقوا فى مدونتى على النعى ويمكن حد غيرهم خالص اكون تركت عنده ولو اثر بسيط جدا هو بس اللى يفتكرنى
يا ترى أنا قدرت اضيف لأى حد منكم اى اثر طيب ؟

---
التدوينه مستوحاه من محمد جمعه

هناك 31 تعليقًا:

No Fear يقول...

السلام عليكم
القدر إن أنا أول واحد أعلق علي البوست ده
ربنا يحسن ختامنا جميعا أولا
و الموت هو حقيقة مؤكدة لازم كلنا نمر بها
بس الله أعلم حالنا هيكون أية
أحنا ندعي ربنا يحسن ختامنا و يقبض روحنا علي طاعة و عبادة و ليس علي معصية
أنت إنسان محترم و أكيد أثرت في ناس كتير و لسه هتأثر في ناس كتير و إن شاء الله بالخير
.
حبه تهريج بقة
اللي هأعمله لو يومك كان قبل يومي هأمسح المدونة بتاعتك من الجوجل ريدر بس
:)
ياعم
متشيلش هم هنقرأ لك الفاتحة إن شاء الله كل فترة
بس جرب أنت
:)

واصطنعتك لنفسي يقول...
أزال المؤلف هذا التعليق.
لماضة يقول...

يا شيخ حرام عليك
خضتني

متقلقش اعملها انت وملكش دعوه
وش مطلع لسانه
بعد الشر عنك طبعا
رغم انه سنه الحياه زي الجواز كده بالظبط

hesham يقول...

عزيزى احمد مهنى

برغم الخضة اللى اتخضيتها اول ما اقريت البوست الا انى ما قدرتش اقاوم نفسى انى اقراه مرة تانية

الفكرة المسيطرة عليك فى هذا البوست هى فكرة جديرة بالنقاش بالفعل و هى الاثر الذى سيتركه الشخص فى من حوله و فى الدنيا بعد ان يغادرها

الاكيد اننا جميعا نتاثر ببعضنا البعض و انا عن نفسة تاثرت بك و بالبوهى و بكل فريق العمل و الاثر قد يكون غير قابل للتوصيف بكلمات او الفاظ و لكنه بالتاكيد تاثير ايجابى و قد تكلمت عن تجربتى مع مدونات مصرية للجيب على المستوى الانسانى فى هذا البوست

http://heshamwords.blogspot.com/2008/08/blog-post_26.html

تجربة مدونات مصرية لجيب التى اتاحت لى المعرفة الشخصية بك و باحمد البوهى و باحمد سلامة على المستوى الشخصى القريب جدا غيرت من نظرتى للواقع للاحسن بعد ان كانت تغلب عليه الطابع التشاؤمية بسب عدة احداث متوالية

و كانت افضل مكاسبى من التجربة على المستوى الشخصى هو اكتساب اصدقاء مثلك و مثل احمد البوهى و احمد سلامة

اما يا صديقى بعد ان ترحل عن دنيانا
تاكد انك ستكون تاركا اثرا ايجابيا و طيبا عند الكثير من الاشخاص من ضمنهم العبد لله و لكنه فى النهاية اثار لدى اشخاص مفردة اما الاثر الاهم الذى سيبقى باذن الله و سيتذكرك به حتى اناس لم تعرفهم و ربما لم تقابلهم فى حياتك بكل خير هو انك احد صاحبى فكرة مشروع مدونات مصرية للجيب

و لان الحلم حق مشروع لنا جميعا فلماذا لا نحلم ان ياتى يوم فى المستقيل البعيد يمسك فيه احد الشباب بالعدد الالف من مدونات مصرية للجيب و ينظر للغلاف الداخلى متطلعا لاسماءاصحاب الفكرة و اعضاء فريق العمل متمنيا ان تتاح له الفرصة فى لقائهم اذا كانوا على قيد الحياة او يدعو لهم بالرحمة اذا كانوا فاراقوا الدنيا

الاثر الحقيقى يا عزيزى الذى يتركه الانسان عندما يغادر الدنيا ليس الاثر الذى يتركه عند اشخاص كان يعرفهم
فهذا منطقى و شىء مفروغ منه
و الاثر الاكثر صدقا و اقوى هو الذى يتركه عند الاشخاص الذين لم يعرفهم و لم يقابلهم من قبل و لكنه اثر عليهم باعماله و انجازاته فى الدنيا

تحياتى لصديقى واخى
هشام

همسات دافئه يقول...

على فكره انت مسئول عن الهارت أتتاك الى كانت هاتجيلى دلوقتى
بس اكدب عليك لو مقولتلكش ان الموضوع ده كله جاه فى دماغى وقاعدت أحسب مين الناس الى ممكن تزعل عليا وتفتكرنى فكرت فى كل الى انت قلته ده وفكرت فى الناس الى ممكن تدخل مدونتى اول مره بعد ما اموت ذى ما انا دخلت عند شيماء بعد ما اتوفت
قررت انى مكتبش حاجه تافهه ولا اى حاجه غلط او تعليق يئذى حد بس مكتبتش النعى بتاعى يامفترى:@
أقولك على سر...انت سايب بصمه عندى جامده مش فى مدونتى بس

عصفور المدينة يقول...

يمكن أكون أنا أو ناس ما تعرفهمش خالص هما اللي يدعولك

خبيب يقول...

مش هيهمك وقتها - أطال الله عمرك - كتبنا النعي أو لأ ، أو افتكرناك أو لأ ..

لأن من رحمة ربنا سبحانه وتعالى إن هو اللي بيحصي آثار الأعمال لا نحن :
"أحصاه الله ونسوه"

وأثر العمل لا يشترط معه أن يشتهر الشخص نفسه أو أن يذكر ..
ربما لا أحد يعلم -مثلا - من اخترع الانترنت تحديدا ، لكن ذلك لا يعني أنه لم يفعل ! وأنه لا يحاسب على كل فرد استخدمه واستن بسنته ..

نحسبك على خير ولا نزكي على الله أحدا ..

عرفت النهاية ، فاعمل لها ..
اعمل لأجر "علم ينتفع به"
أو "صدقة جارية"

حفظك الله

أحمد سلامــة يقول...

في طرق انسانية افضل من كده تناقش فيها موضوع زي كده يا مهنى
ميصحش تمارس صيغة المفاجأة في جملة زي دي وانت عارف اد ايه في ناس بتحبك
انت سيبتلي اعصابي رغم انك معايا اونلاين
ربنا يسامحك

حنان سعيد يقول...

بجد انا قلبيي كان هيقف
انا يمكن اول مره ادخل مدونتك
ولما لاقيت اول حاجه في المدونه كده بجد حاسه اني وقفت ومش قدرت اكمل
ولما كملت حسيت اني كنت في كابوس
اانا كل معرفتي بيكو لما حضرت القاء في الاوبرا مش اكتر
بس فكره ان يكون ليك دور في ظهور حاجه زي المدونات المصريه دي بجد حاجه تخليك في الذاكره دائما
.....
تعرف ..ان الغريب جدااااا
ان من ساعه بس قبل ما افتح المدونه بتاعتك
اني كنت بفكر في اني لو مت ازاي المدونين هيعرفو كده
الفكره جاتلي لاني كنت بفتح مدونه حد كنت بدخله
ولاقيت ان بقاله فتره مش بيدخل
وهو عامل موديراشين لتعليقاته
والشيطان خادني بعيد بقى
وانه لو حصل للشخصيه دي حاجه هعرف ازاي
وقلت لازم يكون الباسورد مع حد
هو اه مع خطيبي بس لازم اوصيه انه لازم يكتب كده في المدونه
عشان يمكن الاقي مابين الناس حد يدعيلي
مش عارفه ..ربنا يحسن ختامنا جميعا
ويجعل لينا من حياتنا هدف ودليل خير في الحياه
وربنا يستخدمنا ديما في الخير
تحياتي لك
واتمنى ان المره التانيه الي ادخل فيها مدونتك الاقي اول جمله ماتخضنيش الخضه دي
تحياتي لك دائما

عاشــــــ النقاب ـقــــة"نونو" يقول...

السلام عليكم
تصدق انا اتخديت بجد
ربنا يديك الصحة والعمر في طاعة الله يارب
ويحسن ختامنا جميعا يارب
كل عام وانتم الى الرحمن اقرب

بثينــــــة يقول...

الله يسامحك خضيتني
..
دايما الفكرة دي بتراودني لكن باوبخ نفسي وأقول لو أنا دة اللي شاغلني أوي اذن انا مش عارفة أقيم نفسي وتأثيري
وأروح أبعد وأقول
إية الخيلاء دي .. وأنا إية أصلا علشان أؤثر في أي حد
وأروح أبعد وأبعد وأقول
وإية أهمية إني أؤثر في حد
وأرجع أقرب وأقول
لو أنا ما أثرتش ومااهتمتش ومت
يبقي إية لازمتي إية لازمة أحلامي وآمالي وإية لازمة حياتي كلها
ساعتها باحس اني لازم اهتم
وأؤثر
وبرضة بيفضل جوايا الفضول دة
وزود عليه فضول نسائي
عن حياة أسرتي بعد موتي
وبيبقي نفسي أكون زي شويكار في حواء الساعة اتناشر
ملاك بجناحات بيرفرف علي الدنيا بتاعته ويعرف مين كان بيحبه ومخلص له وفاكره ومين رماه هو وذكراه

عايزة أقوللك إنك مؤثر .. وفكر دايما ازاي تأثر ايجابيا فيمن حولك
ربنا يوفقك يا أحمد دايما

الطائر الحزين يقول...

يأخى الفكرة دى جات لك ازاى

========
ليس المشكلة فى الموت المهم الاستعداد له
======
طبعا أثرت فى الكثير

son's egypt يقول...

السلام عليكم
هل لما يموت شخص بيكون موته له تاثير علي حياة الاخرين
انا بعتقد ان التاثير بيكون نابع من اعمال الشخص وتصرفاته مع الاخرين

فى القلب يقول...

من أول حرف وأنا أقراء كلماتك أحسست أنك أنت كاتبه لم أشك لحظه أنها مجرد رثاء للنفس

أتعلم لما أحسست بذلك

لانك موجود ومؤثر وعميق وواضح ومحسوس

أنت

كشبح النور تنثر الفرحه و البهجه فى القلوب أينما تحل بغير أن تكون مرئى

فقط بوجودك نحس بسعاده جماعيه

جمعنا الله جميعاً فى الفردوس الأعلى على خير

Monzer يقول...

يا فتاح يا عليم يا رزاق يا كريم

بجد معرفة تقرف وتغم ع الصبح كده

انتوا ليه بتعملوا كده يا جدعان

وكمان حد يستوحي حاجة من جمعة
مالقتش غير جمعة

ده جمعة قادر انه يشلك مرتين ويجيبلك اكتئاب وسواد فى الرؤية والبصيرة ممتدة لعشرات السنوات
لن أنسي لك هذا الموقف أبدا

بس

انت عارفة المدونة شيكوا كنت عمرى ما سمعت عنها

لكن لما توفت حسيت بحاجة غريبة
نفس الشعور الى بيحس بيه أخ لما بيفقد اخوه الرضيع الى لسه ماعشي معاه ولا أي حاجة أبدا والى كان نفسه يعيش معاه ويعرفه كويس ويحبه
وربنا يحسن ختامنا جميعا ويجعلها حياة طاعة وموت على طاعة

saragebaly يقول...

اول مرة ادخل فيها مدونتك

قلبي وقع من اللي انت كاتبه

بس برضو سألت نفسي ياترى لو مت ازاي المدونين هيعرفوا؟؟

وياترى بعد ما يعرفوا المدونة هتموت زي صحبتها ولا ممكن حد يفنكرني ويدخل ويطلب لي الرحمة ؟؟!!!!

يا مراكبي يقول...

أنا مش عارف ليه الموضوع ده مأثر على مدونين كتير جدا وناس كتير إتكلمت عنه

أنا مش عايز أقول إنه موضوع تشاؤمي لأن الموت يأتي فجأة

لكن من الواضح إن التدوين خلق علاقات راقية بين المدونين خلت المدون مننا بيبقى متمسك جدا بالحياة أكتر من الأول .. وبالتالي فكرة الفقد بتبقى مؤرقة جدا

إن شاء الله يكون لينا تأثير طول ما إحنا مخلصين في اللي بنعمله سواء في حياتنا أو بعد مماتنا

واصطنعتك لنفسي يقول...

يهمني رأي حضرتك في البوست الأخير

يا ترى ممكن تشرفني برأيك؟

thanx in advance

إيمان

عاقلة علي ارض الجنون يقول...

تعرف .. ؟

أشعر بأنني متأكده أن شبح الموت من اصدقائي الدائمين ما إن ترائي لذهني شيئا عنه إلا و رايته ..

البقاء لله حقا .. فالله باق و كلنا إلي الفناء ذاهبون ..

الحلم العربي يقول...

بجد حرام عليك
انا اتخضيت و كنت خلاص هعيط
الله يسامحك
لكن الفكرة جتلى بردو قبل كده
الغريب انى ساعتها كنت مهتمة بمين اللى ممكن يتأثروا من المدونين أكتر من اصحابي اللى بشوفهم وبيشوفوني
انا مش عارفة اقولك ايه
لكن ربنا يحسن ختامنا جميعا
و نكون بجد عملنا حاجة للإسلام قبل ما نمشي
مش مهم اوي نكون أثرنا في الناس لكن المهم نكون عملنا حاجة بجد ... فيه جنود ماتوا شهداء كتير في المعركة و محدش فاكر اسمهم لكن ربنا بيجازيهم من غير ما حد يفتكرهم
أصل ممكن يكون موتنا سبب في هداية ناس فعلا لكن احنا اصلا ( لا قدر الله)ما نكونش عملنا حاجة كويسة فنكون احنا كده عاملين زي الجسر اللى الناس عدت عليه علشان تدخل الجنة
المهم اننا نعمل للجنة لأنفسنا الأول
أشكرك انك فكرتنى بالموت اللى هو حق علينا كلنا
تحياتي

هبة النيــل يقول...

إنا لله وإنا إليه راجعون

دانا أول مرة أشوف المدونة دي

لا حول ولا قوة إلا بالله

محدش يعرف دوره امتى فعلا

هبة النيــل يقول...

يانهارك أبض

أنا من الخضة الأول ماخدش بالي

ولسه هعيط

لولا رد لماضة

دا منظر دا

هههههههه

المهم اني لا اعرفك ولا شفت حضرتك قبل كدا

بس صعب عليه أوي صاحب المدونة

وجه فبالي بردو يا ترى مين اللي هيعرف لما انا هموت

وكأبتني منك لله والله

لعلمك هتابعك ان شاء الله علشان أغلس علييك بس

عشان وجعتلي قلبي عالفاضي

Numb يقول...

الله يخرب بيتك
اصلك مجتش انهاردة الكورس
و مرنتليش
بطل كئابه و عبط
و متفكرش فى كدة
انت دلوقتى تفكر فى الخطوبة و الشغل و الجواز و الاولاد و المستقبل

ربنا يجازيك يا احمد والله العظيم موتنى

Jana يقول...

أطال الله عمرك ..
لكن وقتها قد يجد الانسان من يدعو له بظهر الغيب ولم تتوطد بينهما علاقة ..

اما التأثير فى الناس ... فاتركه لله ..
حين يُخلص المرء لربه ..يحبه ويرضى عنه ..فيُرضى عنه عباده ..فيترك لديهم انطباعا وتاثيرا بأفضل ما يكون
هذه هى القاعدة

انكسارات .. احمد البوهى يقول...

عمق الاثر يجعل لذكراك روح اخرى تعيش بين جنبات الاخرين .. فكثيرين ماتوا ولايزالون على قيد الحياه وهنالك احياء وقد توفاهم الله من مئات السنين
ــــ
بشراك اذا احبك انسان فى الله ودعا لك بظهر الغيب
ــــ
ــــ
عالهامش
ــ
ماتقلقش ياابو حميد عارف داانا ممكن ساعتها اكتب اخويا وصديق عمرى وصاحبى وحبيبى وممكن اكدر الصباغ بالذات اخليه يعملك خمس جروبات عالفيس بوكواعمل بانر وشارة سودا فى المدونة

ابقى ادينى الباس ورد تانى ياغالى عشان ضاع وعلى فكره مش بعيد ساعتها اعمل اهداء الكتاب ليك D:

انكسارات .. احمد البوهى يقول...

انت عملت للتعليقات مودريشن .. يعنى انا ممكن ارخم عليك فى مره الاقيك حزفت التعليق ؟؟.... طب هات بقى الباس ورد بسرعة كدا عشان مانخسرش بعض
ــــــــ
دمت حيا ..يا صديقى

MKSARAT SAYED SAAD يقول...

انا لله وانا اليه راجعون
اللهم ارزقه رحمة ومغفرة وانير قبرة واجعلة روضة من رياض جناتك

شيمـــــاء يقول...

اختى توفت من 3 شهور
وهى عندها 23 سنة
بس سابت اثر عمر ما حد هيقدر يسيبه

مش مهم الناس هيقولوا ايه بالظبط واننا نفكر فى ده
لكن الاهم اننا نعمل اللى يخلينا اخرة و دنيا راضيين ربنا

وتفائل خير
:)

كيــــــــــــارا يقول...

يمكن انا وانت موش نعرف بعض كويس

بس كفايه المعني والاثر اللي اول اما سيرتك بتيجي فيهم
بيقولو عليك انك بجد انسان من جواك

ودا انا بحترمه فيك

اماالموت هقول ربنا يحسن ختامنا جميعا

نفس موضوعك في بالي كتير

MzAjYaH يقول...

بلووق جميل ومحتواه اجمل

يعطيك العافيه

bobos يقول...

بجد اتخضيت واطال الله عمرك لتمتعنا بشعرك الجميل