الأحد، 20 مايو 2007

انا نزلت فى الجرايد

يا ريت تقروا البوست اللى تحت قبل دا
المصرى اليوم مشكوره نزلت البوست اللى فات اللى هى قصيدة شكلينى فى عدد 19 /5/2007
وانا طبعا مكنتش اعرف لولا ان صاحبة مدونة "نقطة ميه " قالتلى فى التعليقات
وفضلت دماغى تودى وتجيب هى القصيده نزلت بأسمى طبعاً لأ يبقى حد سرقها ونزلها بأسمه فى المصرى اليوم وطبعا كنت خايف جدا مش عشان القصيده اتسرقت أصلى مش بنزل اعمال ادبيه على مدونتى غير لما اكون مسجلها عشان حقوق النشر والحاجات دى .. بس كنت خايف لتطلع المصرى اليوم اللى الشعب بيثق فيها بتسرق الاعمال من النت
أصلى زمان ايام ما كنت مدير تحرير مجلة الكليه كان رئيس التحرير بياخد اعمال الناس وينزلها بأسماء تايه وهكذا وكان بيمشى كل حاجه زى الحلاوه أصله كان واصل
والحمد لله عملت اتصالالتى بزمايلى الصحفيين فى المصرى اليوم نفسها وبناس تانيه عشان اجيب العدد وفى الاخر طلعت القصيده نازله وتحت منها اسم مدونتى
طبعا مش دا المهم مانا قبل كده نزلت فى المصرى اليوم القصيده اللى هتلاقوها تحت فى المدونه وكتبت فى مجلات كتير ..بس المهم انا نفسى اعرف المصرى اليوم عرفت مدونتى منين مع ان المدونه لسه جديده ومتشهرتش
انا كان لازم اشكر المصرى اليوم

هناك 7 تعليقات:

بحبك يا مصر يقول...

مبرووووووووووك

أكيد أنت دلوقتى سعيد مش حزين

أنا كمان نزلى بوست فى نفس العدد وصاحبة مدونة "نقطة ميه" برده هى اللى بلغتنى ، بس لو عاوز تشكر حد أشكر صاحبة مدونة " قلمى الحر" لأنها هى اللى نزلتها

REEMOO يقول...

معتقدش ان جريده زى المصرى اليوم هتخاطر بإسمها وتنزل قصيده من غير ما تتأكد من مصدرها
وبجد الف مبروك يا حزين
مش لازم يكون البلوج مشهور علشان قصيدتك تنزل فى الجريده
الكلمه الحلوه مش محتاجه شهره لانها بتوصل لوحدها
-------
سورى لو كنت قصرت فى السؤال عليك
تحياتى

قلمي الحر يقول...

السلام عليكم
ازي ياحزين , اولا احنا عملين ركن في صفحة الشباب"هوت لاين" في المصري اليوم , للمدونات , ونجيب فيه كل يوم بعذ الكلام المنشورفي المدونات , مع كر اسم المدونة واللنك الخاص بها حفاظا لحقوق الملكية الفكرية
انا بشتغل في المصري اليوم في صفحة الشباب , وزميلة صاحبة مدونة بحبك يامصر في كلية الاعلام قسم صحافة الفرقة الرابعة
بس مش انا اللي بتعمل ركن المدونات , احنا بنتشارك فيه كلنا واللي بالاساس بتعمله صاحبة مدونة مقاومة , وانا بس عملته اليوم اللي نزلت في مدونتك ومدونة بحبك يامصر بدلا منها , ويارب اكون عملته كويس
انا نزلت شعرك لانه كان يستحق انه ينزل وسياسية ركن المدونات عندنا مش بشهرة المدونة , ولكن بجودة اللي بتقدمه
ومتقلقش احنا في المصري اليوم بنخاف على اصحاب المدونات اكثر من نفسنا
على فكرة يسعدني تتابع الصفحة اسمها هوت لاين وتقولي رأيك , وده اميل الصفحة لو حبات تبعت لنا اي حاجة hotlinebage@yahoo.com
اما ميلي الشخصي فهم متاح للجميع ممكن تبعت لي اي شء تحبه , واميلك عشان اقدر اضيفك , لاني لا اضيف اي حد على ماسينجري
شكرا لك

الحلم العربي يقول...

ألف مبروك
هي قصيدة فعلا تستاهل انها تنشر في الجرايد
و عقبال ما نشوفك في التليفزيون كمان
تحياتى

نقطة مية يقول...

مبروك..و جميل اني اكون صاحبة الخبر الحلو و اشارك حد فرحته بمجهوده و موهبته خاصة لما تكون تستاهل و تطلع في جريدة ليها مصداقية..

sendbad يقول...

تحياتي الي الامام ياصديقي

بحبك يا مصر يقول...

جبهة وكلام كبير.. مين قال الكلام الكبير ده .. بعدين احنا وماليك عليه حلفان عندنا بحث ما يعلم بيه الا ربنا .. بحث عواصف اقصد دكتورة عواطف ، ده غير الامتحانات اللى كمان اسبوع.. بجد مطحونين.. ربنا يستر وتعدى على خير