وصمت الخاشعين هو الكلام

-------

غصة فى حلقى وشئ واثب لا يكاد يقف يتردد دوماً فى مخيلتى

اشعر بالغربه وبرغبة ملحة فى الكلام

ولا اجد من احدثه

تغمرنى نشوة الصمت

فأقرر سريعا قبل أن يعود الواثب بأن أصمت

أصمت لحين لا اعرفه

فكما نهلت من الكلام أحتاج أن انهل اكثر من السكون

ـ

أثر فى نفسى

ـ
نظر الى ديوان ملقى على المكتب مكتوب عليه اسمى
وداعب لحيته الطويله ولم ينظر لى
ظل ناظراً الى الديوان وهو يقول " والشعراء يتبعهم الغاوون"ـ

ـــــــــــــــــــــــــــــــــــــــــــــــــــــــــــــــــــــــــــــــــــ
وفى أشد لحظات الضحك ... نظر لى وقال بلهجة ساخره جدا
لكنه كان جاد من داخله " إحنا مش هنتوب بقى "ـ
احمد البوهى صاحب مدونة انكسارات - كورنيش النيل الملك الصالح
ــــــــــــــــــــــــــــــــــــــــــــــــــــــــــــــــــــــــــــــــــ
قالوا ازل كلمة رسول الله فوالله لو كنا نعلم ذلك لأتبعناك
فقال امسحها يا على فقال لا فقال امسحها يا على فقال والله لا افعل
فقال له " أرينيها يا على " فأشار له سيدنا على على الكلمه
فمسحها رسول الله صلى الله عليه وسلم فلم يكن يعرف القراءه
ـــــــــــــــــــــــــــــــــــــــــــــــــــــــــــــــــــــــــــــــــ
قالت " متنسونيش لما اموت وابقوا اسألوا على بعض "ـ
امى حفظها الله
ــــــــــــــــــــــــــــــــــــــــــــــــــــــــــــــــــــــــــــــــ
وأحتضننى بقوه وهو يبكى ثم قال " ادى حال الدنيا "ـ
عم على المسؤول عن ضيافتنا فى السودان - لحظة العوده لمصر
ـــــــــــــــــــــــــــــــــــــــــــــــــــــــــــــــــــــــــــــــ
وقالت لى "احبك انت" ايام الجاهليه - ايام الجامعه
ــــــــــــــــــــــــــــــــــــــــــــــــــــــــــــــــــــــــــــــ
فلما علمت ما قاله مسطح عادت الى بيت ابيها فسألتهم فسألوها
فبكت وقالت " والله المستعان على ما تصفون " ـ
أمى السيده عائشه رضى الله عنها
ـــــــــــــــــــــــــــــــــــــــــــــــــــــــــــــــــــــــــــــ
قالت ان الله لن يضيعنا ... لن يضيعنا
ـــــــــــــــــــــــــــــــــــــــــــــــــــــــــــــــــــــــــــــ
ـ "والله لشيّله اربع مواد " ـ كانت هذه كلماته التى لم يقولها
فى وجهى ولكن وصلتنى من اصدقائى
عميد الكليه - عندما كتبت عن تزوير انتخابات اتحاد الطلبه
فى جريدة الدستور
ــــــــــــــــــــــــــــــــــــــــــــــــــــــــــــــــــــــــــــــــ
هاتفنونى فقلت لهم " لا اريد ان اعرفكم ثانية " ـ
اعز اصدقائى - عندما خرجت من الترتيب على الدفعه
ــــــــــــــــــــــــــــــــــــــــــــــــــــــــــــــــــــــــــــــــ
كلما دخلت مدونتك ازداد يقينا انى وانا ابحث عن كتاب فى
مكتبه ذات يوم سأجد ديوان لحضرتك
من التعليقات بمدونتى
ــــــــــــــــــــــــــــــــــــــــــــــــــــــــــــــــــــــــــــــ
قال لى" احسبك على خير " وانا ابعد ما يكون عن ذلك
ــــــــــــــــــــــــــــــــــــــــــــــــــــــــــــــــــــــــــــــ
رأيته يشق الصفوف من بعيد لم اتخيل انه يسعى لى.. خاصة
فى هذا المكان بالتحديد ثم انحنى لى وانا جالس وصافحنى وقبلنى
فى كتفى وقال لى "i will meet u in el ganna " ـ
قالها لى ورحل " سأقابلك فى الجنه "
رجل هندى عجوز ذو لحيه بيضاء كنت قد تركت له مكانى
فى روضة رسول الله بالمسجد النبوى ليصلى ركعتين
ـــــــــــــــــــــــــــــــــــــــــــــــــــــــــــــــــــــــــــــ
وبعد ان انتهيت من حديثى مع الرجل التركى الذى كنت احدثه
بالانجليزيه عن ضرورة ان نتضافر جميعا كمسلمين ومددت
يدى وسلمت عليه وجدت ذلك الرجل العجوز من اندونسيا
والجالس على يسارى ينكب على يدى ويقبلها فاندهشت وقمت
ساحة المسجد الحرام بمكه
ـــــــــــــــــــــــــــــــــــــــــــــــــــــــــــــــــــــــــــــ
سألتها هويتك ايه ؟
قالت لى " مصريه مسلمه .. حرة العقل .. مقيدة السلوك "ـ
ــــــــــــــــــــــــــــــــــــــــــــــــــــــــــــــــــــــــــــــ
وبعد ان انهال بالبكاء شاكيا لى
نصحته وقسوت عليه فى الكلام وزجرته
ثم بعد يومين فعلت مثله
ــــــــــــــــــــــــــــــــــــــــــــــــــــــــــــــــــــــــــــ

واشاحت بوجهها عنى واغرورقت عيناها وقالت

ـ" معلش يبنى انا اسفه "ـ

امرأه من جاراتنا ذهبت معها للمستشفى بعد ان رفض ابنها الذهاب

ـ
ما سبق اشياء تركت اثراً فى نفسى ... ـ

يا طير يا مهاجر سلم على الحنين

ـ
محبــــــوس ومخبى النور جـــــــواك
والدنيا بتتلفت وتدور
وتتـــــــــــــــوه الناس ويــــــــاك
مانا عارفك... مجنون من يومك
محتــــــار وبتنسى وبتنـــــادى على ناس نسياك
جرى إيه .. وبتصرخ ليه ؟
أنا سامعك وودانى مش سامعاك
أنا حاسس بالنور اللى فى قلبك
النور محبوس
مش راضى يدوس على احساسك
بيفكر فى حنين أنفاسك
لكن محبوس
أنا فاهمك وضلوعى دى محوطاك
أنا حاسس بالدمع اللى فى عينك
وبيجرى فى دمى وشرايينك
من نفس النور
بتبص لفوق وبتتأمل وبتتحصر
وتبص هناك
و حنيــــــــــــن
و سنيـــــــــــن
وأنيـن محبوس فى النور
والنور مش ساكت
بيحاول يخرج وبيصرخ
والدنيا بتتحول وياك
والقلب يرق يدق يشق طريــــــــــــــــــق للنور
والظلمه بحـــــــــور سَجناك
والشط هناك
انا هستناك
مش جاى معاك
أنا اصلى لقيتك متحاوط .. محبوس
ومخبى النور جواك
والظلمه بحور
والشط هناك
انا هستناك
ـ انا هستنـــــــــــــــــــاك
ـ
ـ
ـ
ـ
اليوم واليوم بالذات ليس ككل الايام التى تمر بحياتى .. انهارده اتصل بيا اصدقائى قالولى تعالى اتفرج معانا على الماتش على القهوه .... اليوم لم اكن مدعو لأذهب لأشاهد الماتش فقط ولكن لتوديع احد اعز اصدقائى والذى سيغادر بعد يومان وكعادتى أتأثر بلحظات الفراق جداً .. وتعودت فى كل لحظة فراق بحياتى ان اتظاهر مجرد تظاهر انى سأقابل هذا الشخص كعادتى معه .. تتصافح الايدى وتتقابل العيون بدون احضان بدون دموع او شروع فى الدموع بدون عبارات او كلمات وداع ... فقط اصافحه واقول له اشوفك بعدين .. ولكن لعل الدنيا رفضت حتى ان تسمح لى بهذا التظاهر فلم اوفق فى رؤيتهم
اليوم كان المفروض ان اودع شخص احببته واحببت ابتسامته وطيبته وحرصه على هذا الوطن واحببت فيه دينه وامانته واحببت فيه اخلاصه لمصر ذلك الاخلاص الذى دفعه الى الهجره ساخطاً عليها بعد كل ما رأى منها
اليوم ودعت مع محمد كل ملامح شباب جيل محترم وتوارت مع ابتسامته معانى كثيره من الحياه ... كعادتى مع هذه الحياه الفانيه وهذا الوطن الذى اجتمعنا فيه انا واصدقائى على حبه والتفكير من اجله حتى اختلط علينا هذا الحب فعجز هذا الوطن الكسيح (عفوا يا مصر لا اقصدك يا حبيبتى ولكن اقصد ما يحدث بك)..عجز عن ان يحافظ على شمل اصدقاء تحابوا فى الله .. عجز عن ان يحافظ على عذرية جنسية ابناءه وعجز عن ان يحافظ على البسمات المتفتحه على وجوه شباب عملوا من اجله واحبوه وعجز هذا الوطن حتى عن ان يقاوم العجز

اليوم يهاجر ابن بار لمصر وفى نفس الوقت يهتف العاجزون الغائبون المغيبون ويصيحوا ويطلقوا طلقات ناريه عشان المنتخب كسب ... هيرجعلنا شوية عيال بتلعب وهيمشى من عندنا كل يوم عشرات من امثال صديقى وغيره
اليوم انا لا اعلم هل افتقد مع صديقى المهاجر الذى لم احظى حتى بفرصة ان اتظاهر بتوديعه ... لا اعلم اذا كنت سوف افتقده ام سأفتقد معه الوقوف على كوبرى الجامعه نتأمل النيل الساعه 6 صباحا ام سأفتقد معه الوقوف فوق مأذنة باب زويله ومسجد قلاوون نستشعر زمن العزه ام سأفتقد معه ليالى الوقفه بوسط البلد ام سأفقتقد معه معنى الوطن ... صديقى ان كانت مصر لم تكفيك كوطن فحب أصدقاءك لك فى الله هو نعم الوطن
ربــــــــــــــــــاه أرجــــــــــوك لا تعاقبنى بإفتقاد كل من احببتهم .ً

---

بوست قديم نشر فى 10/2/2008 - لكن الهجره والافتراق مازالوا يحاصرونى

مشروع وطن

أنا لما رحت المدرسه
كان غرضى اعرف استهجى
كلمة وطن
انا لما خطيت خطوتى
انا رحت خطيت كلمتى
وكتبت فوق السطر ميـــــــــــــم
معرفش .. ميم معناها مصر ؟!!!
ولا الحروف اتشكلت من غير حنين!!
ولا السنين خلقت وهن
ولا الشجن يولد شجن
ولا الوطن مش راضى يكتب كلمته ويّا الانين
ولا البدايه قصدها مشروع وطن
--- ---
أنا كلمة متحاوطة بقوسين
لا عارف اهرب من ضلوعك
ولا عارف ابقى مش حزين
يا مصر يااما بتحبلى فى اليوم الــــــــوف
تفتكرى ليه الوحمه كانت فى الجبين على شكل خوف
ولا الحروف اتشكلت من غير حنين !!
انا ياما راجع لأجل خدى يكون مداسك
انا لما بفرح بفتكر اهلك وناسك
أنا صوت انين
لساه بينده بين نيلين
إتمد واحد جوه قلبك
والتانى شريان جوه قلبى
بيمدنى بطعم الحنين
لساه بيصرخ وساعات يئن
وساعات بيصنع معجزات حكايات وفن
وساعات بيكتب او يقول مشروع وطن
-- -- --
يا حبيبتى يللى
القلب محجوزلك تملى

يام القلوب الطيبه
وبرغم بعد الناس بلاقى ناس كتيره قريبه
مبقتش عارف من كتر حبك
هعمل ايه
تفتكرى انك هتيجى يوم وهتكرهينى وهكرهك
لأ معتقدش
تفتكرى انك تجرحينى وهردهالك واجرحك
لأ مفتكرش
تفتكرى انى فى يوم هخونك او هغشك واخدعك
لأ معتقدش
انا اصلى ماشى فى سكتك
ولا عمرى هرجع او هضن
معرفتش اكتب من زمان كلمة وطن
وكتبت ميم
مشروع وطن
-- -- --
يا مصر يااما متدمعيش
انا مش هسيبك متخافيش
عهدين عليا وعهد تالت
مش هبقى ساكت
مهما السكات بيتحكم فى صوتى
مش هبقى صامت
رغم موتى
راح هندهك وهتسمعينى
وهكلمك وتكلمينى
وهاحط ايدك جوا ايدى
واتمشى وياكى .. تسيبينى
تروحى تجرى ومن بعيد
راح تندهى .. تتبسمى
وهترجعى وتشبكينى
وتدمعى
متدمعيش
انا مش هسيبك متخافيش
عهدين عليا وعهد تالت يا حبيبتى
هتعلم ازاى اندهك
ما انا اصلى لما رحت المدرسه
كان غرضى اعرف استهجى كلمة وطن
وكتبت فوق السطر ميـــــــــــــم
معرفش ميم معناها مصر؟!!!
ولا الحروف اتشكلت من غير حنين
ولا السنين خلقت وهن

ولا الشجن يولد شجن

ولا الوطن مش راضى يكتب كلمته ويّا الانين

ولا البدايه قصدها مشروع وطن
انا أصلى م اليوم ابتديت مشروع وطن
ـــــــــــــــــــــــــــــــــــ
ـ
ـ
على الهامش
القصيده مهداه للعدد الاول من مدونات مصرية للجيب والذى هو بعنوان مشروع وطن
ملحوظه طبعا انتم عارفين انى اى كلام خالص فى الشعر العامى :)

هشوفكم هناك

ـ

مش هتكلم كتير

هستناكم هناك

الخميس 22/5 الساعه6.30 مساء

عمر بوك ستور طلعت حرب

فوق فلفلة

إنها الحياة

اليوم تنتهى سنه من حياتى ويبدأ عام جديد .. أتذكر وانا صغير كان العام بالنسبة لى مرتبط بالمدرسه لم يكن التاريخ الهجرى او الميلادى او اى تاريخ اخر يمثل لى محور اهتمام .. فقط كان كل ما يهمنى هو متى ينتهى العام الدراسى لتبدأ الاجازه .. بعد فتره طويله تعلمت ان العام عندى مرتبط بأشياء اخرى غير الزمن .. العام عندى لم اعد اقيسه بالزمن ولكن اقيسه بمقدار الخبرات والقيمه المضافه من الاحداث على مدار العام .. الزمن الان ليس مرتبط عندى بفكرة الوقت ولا بالغروب والشروق ولكنه مرتبط بالوقت المبذول فى معرفة جديده وبكل شروق علم وغروب جهل
...
فى هذا العام تعلمت الكثير ولازلت اتعلم
تعلمت ان دائما هناك مساحه من حياتك يجب الا تستخدمها وكن عليك ان تتركها للاخر ليس لأنه الآخر ولكن لتجعله يشاركك مساحتك فنصبح نحن جميعا هو ذلك الاخر
تعلمت ان التسامح هو اسمى القيم التى تهب الحياة وأن التماس الاعذار هو من اروع الطرق فى حل الخلافات
تعلمت أن رأى هو مجرد وجهة نظر محتمل بنسبه كبيرة ان تكون خطأ وأن رأى غيرى لابد وأن اتعامل معه على انه صواب حتى يثبت العكس
تعلمت أن رأى وكلامى ان لم اقله فأنا حرمت غيرى من وجهة نظر حتى وان لم تفيده فربما انها لم ترد عليه وأن رأى غيرى وان كان مختلف معى فهو وجهة نظر تستحق الاحترام
تعلمت أن الاندفاع او التسرع من أصعب الاشياء التى قد تواجه شخص ناضج وأن الاستفزاز والعصبيه لا يؤدوا الى اى شئ سوى
تعلمت أن هناك دائماً أصدقاء وأن الاعداء انما هم مجرد اشخاص ربما يكونوا صالحون ولكنك لم تفهمهم وهم لم يفهموك فلابد ان تتحلى دائما بالصبر وروح الاقتناع
تعلمت ان الحياة لا تصلح الا بوجود آخر يشاركك نفس الحياه وأن وطن واحد كفيل بأن نعيش جميعاً على أرضه وأن الانسان لابد أن يترك مجالا للمشاركه والتفاهم
تعلمت ان ليس من حقى ان اغير احد ولكن يجب ان اتعايش معه وأنا راضى عن هذا التعايش
تعلمت أن الاخرين .. أناس احبهم .. شرورهم تزيد خبرتى بالحياة وخيرهم يزيد محبتى لهم
انها الحياة ... إن اردت ان اعيش فيها وحدى فسوف أموت لا محاله ربما امارسها ولكنى سأحيا مجازاً وأموت موت معنوى
وأعتقد أن سنى زاد هذا العام بمقدار اكبر من كل الاعوام السابقه
اعتقد انى سأكون اكثر هدوءا واكثر تسامحاً وأكثر تفهم
ولازلت اتعلم
.....
أحمد مهنى ‘

اتفاق

ـ المحه ياتى من بعيد يكتم ضحكته وانفاسه بيده ... ويصطحب كل اخوته يعتلى السرير ثم يبدا فى جريمته المعتاده معى ... فتيله طويله من الخيط الرفيع يبدأ فى تمريرها على وجهى حتى استيقظ فينفجروا جميعا من الضحك .. لكنى اليوم انا هو الشخص الذى سيضحك لأنى مستيقظ بالفعل ... يقترب اكثر واكثر .. يشعر بالاطمئنان لكونى اصدر صوتا يدل على استغراقى فى النوم حتى يقترب ويبدأ فى اخراج الخيط من جيبه فأنقض عليه وامسك بهم جميعاً يبدأوا فى الصياح " ماما.. بابا هياكلنى " واثناء اللعب والمرح يفاجئنى اخوه الصغير يحيى بسؤال اجابته اصعب من تمرين يوم كامل فى صالة الجيم ... بابا مش قولتلنا هفسحكم يوم السبت ؟
طبعا انا لازم اجاوب .. انا قلت كده يا يحى ؟
ايوه
امتى ؟
السبت اللى فات لما قلتلنا ان ماما تعبانه ومش هينفع نخرج ؟
انا محاولا الهرب من الموقف ... ايه دا هى ماما كانت تعبانه السبت اللى فات ؟ طب تعالوا لما نطمن عليها
الواد حمزه الكبير .. بابا هو حضرتك بتحاول تهرب ولا حاجه ؟
طالما عهدته زكى واتنبأ له بمستقبل محترم .. ربيناه على منهجيه فى التفكير تجعله منظم مرتب ومنطقى
بصراحه اه يا حمزه انا بحاول اهرب
طب ما تقول كده بصراحه
انا اسف
هكذا تعودت معه لا اخجل ابداً من اسفى .. طبعا ضحى وإيثار ساكتين ويبدو على وجهيهما الامتعاض الشديد لأنهم مش هيخرجوا ...
مالك يا ضحى ساكته ليه ؟
مفيش
طب وانت يا ايثار ؟
انا عايزه اخرج
طب تيجوا نلعب مصارعه
كلهم فى نفس واحد ماشى
وتبدأ اللكمات والزغزغه من كل اتجاه ولا يتركونى الا بعد ان ينتصروا علىّ عدة مرات حتى استسلم واعلن انسحابى من المعركه
فى الجانب الاخر زوجتى تنادى
احمد ناولنى صينيه فاضيه عشان انقى الرز
احاول المزاح معها قائلا طب ما انقيه انا يا حبيبتى
طب ربنا يخليك ياحمد طالما هتنقيه وانت واقف بقى خلى بالك من صينية البطاطس عشان انا هروح انشر الغسيل
ابلع ريقى واقول لها وماله مانا كده كده واقف متناسيا انى كنت امزح من لحظه واحده
حمزه ويحى عايزينى العب معاهم فيفا على الكمبوتر وانا مش بعرف العبها انا بعرف العب مورتال كومبات ضحى عايزانى احكيلها حدوتة امنا الغوله ... نفسى اعرف ايه المتعه فى حدوتة امنا الغوله من وجهة نظر طفلة فى سنها يبدو ان الثقافه الغربيه اثرت فى نشأة ضحى كيف سأحاول معالجة افكارها
ايثار مازالت تحتفظ بالهدوء الذى اكتسبته من امها ... اشعر وكأنها تنظم ابيات شعريه وهى صامته البنت دى هتكون رسامه هايله .. ومازالت ايضاً تحتفظ بنضارة بشرة امها
وانا مازلت اعتنى بصينية البطاطس
زوجتى تنادى عليا احمد كلم تليفون احمد البوهى عايزك
اذهب لأكلم صديق العمر والكفاح
احمد يسألنى ما تيجى نتقابل انهارده يا ابوحميد
معلش يا غالى مش هينفع
يا عم انا ما صدقت خلعت من مراتى انهارده قولتلها سيبينى فى حالى بقا .. هو انت فاكرانى ايه .. مازنجر ؟!! انا بنى ادم من لحم ودم وفى عروق بتنبض فى جتتى وعايز اقابل الواد احمد مهنى
انا وهو نضحك بشده دائما هو كذلك يفعل كل ما يريد بالمزاح انا متاكد من ان زوجته انفجرت من الضحك عندما قال لها تلك الجمله .. وربما تجلس بجواره الان وتضحك
معلش يا احمد بس مشغول والله جدا
بتعمل ايه يعنى
بعمل صينية بطاطس
ننفجر بالضحك مره اخرى ... تنتهى المكالمه على وعد بأن نلتقى غداً ... زوجتى تنادى يا احمد معلش يا حبيبى هتعبك معايا ممكن تجيب الشنطه اللى فوق الدولاب
ابدأ فى التذمر ولكن لا محاله سوف افعل .. تلك المرأه اسرتنى باخلاقها معى طيلة حياتى انا احبها واحترمها بشده وافتقدها كثيرا حتى انى ما البث ان انفرد بها حتى اختلق حاله من الطفوله وأضع رأسى على رجلها وابتسم وانصت لها واحيانا تأتى هى لى لتضع رأسها على رجلى وتنام وتستغرق فى النوم وانا انظر اليها فقط .. لذلك سوف امتثل لطلبها واطلع فوق الدولاب اجيبلها الشنطه .. الواد يحى عايز يلعب مصارعه تانى وحمزه راح درس القرأن .. ضحى بتحاول تقلد مامتها وهى بتنادى عليا .. ايثار مازالت فى تأملاتها .. صينية البطاطس شكلها اتحرقت
مراتى هتموتنى .. انتهيت من تنقية الارز .. زوجتى تنادى مره اخرى
استيقظت من ذلك الحلم على صوت امى تنادى علىّ لبدأ يوم جديد من العمل الشاق .. مشوار طويل من المطرية للمهندسن كل يوم وبالرغم من انى كنت تعبان جدا فى الحلم الا انى اشتاق الى الواد حمزة ويحى والى ضحى وايثار والى امهم والنونو الجديد اللى فى بطنها .. لو جه ولد هسميه معاذ ولو بنت هسميها مريم هكذا كان اتفاقى معها قبل الزواج انا من سأختار اسماء ابنائى
------------------

حالة تزوير فكرى

ـ
اكتشفت ان هناك مدونون مسيحيون ومسلمون
ينتهزون الفرص
يبدلوا الحقائق
ليثيروا الفتن
ربما بعضهم كان حسن النيه ولكن خانه التفكير
ربما اكون انا اخطأت من البدايه
اسف
لكنى لا اريد اثارة فتنه بسببى
الموضوع منتهى ومغلق للصالح العام
حتى لو سيهاجمنى الجميع فكل ما يهمنى الان الا تثار فتنه بسببى
فهل هناك اكثر من الاسف يمكن تقديمه ؟
ولا يزالوا لا يردوا على سؤالى هل هناك اكثر من الاسف
لكنهم يفرحون بأقامة المآتم
ويحبون اشعال الحرائق كعادتهم
ولكنكم تحرقون أغصان الزيتون

بعضاً منّى

ـ
أم للانسان ما تمنى
من سورة النجم
وأنه هو أضحك وابكى
من سورة النجم

ايات من القرآن استغرق معها حتى النخاع ... فلا اعلم من انا حينها ولا اعلم ماذا اريد وتنتفى معها كل رغبه فى اى شئ غير التضاؤل والانكسار الشديدين
اضم قدماى واطأطأ رأسى وكتفى واضع يدى اعلى صدرى حتى اسجد فأتمنى الا اقوم
فى حياتى ايات تجعلنى اتوقف عن تلاوة القرآن حتى انتهى من التأمل فيها
استغرق معها ليوم يومان وهناك ايات مازلت اتأملها من عامان
ويأخذنى الزهو بتجويد القرآن
" ليس لك من الامر شئ أو يتوب عليهم أو يعذبهم فإنهم ظالمون "ـ
سورة ال عمران
ان تعذبهم فإنهم عبادك وإن تغفر لهم فإنك انت العزيز الحكيم
سورة المائده
وازهو مرة اخرى بتجويد القرآن والقرآن لا يجود لأنه فوق مرتبة التجويد بل تجود القراءه
ولى ختمه مازلت اجودها منذ التزامى فلا اعلم متى سأنهيها ولى ختمات انتهيت منها وفى كل مره اتوحد مع القرآن فأرتقى
فتلاوته متعه وتجويده حياه وتحقيقه علم واهماله موت بل اشد من الموت
وسماع القرآن له احاسيس مختلفه تماماً عن ترتيله
فسماعه نوع خاص من الحياه فى اللاوعى تقطعك عن عوالمك المعهوده لتضعك فى عالم لا تكاد تدركه حتى تعلم انك جاهل وانك لم تحصل من الادراك الا الامر اليسير
" وحنانا من لدنا "ـ
سورة مريم
" سيجعل لهم الرحمن ودا "ـ
سورة مريم
فإن مع العسر يسرا إن مع العسر يسرا
سورة الشرح
فكم من غافل خاسر لم ينعم به ... فوالله عندما اسمعه واشعر بتلك القشعريرة بداخلى فلا احتاج الى اى احد ليثبت لى ماديا أو منطقياً ان الله موجود ولا احتاج ان يثبت لى احد بالاعجاز العلمى ان القرأن كلام الله
فجنتى فى صدرى
من الاسبوع القادم تبدأ التلاوة المرتله للشيخ محمود على البنا على اذاعة القرأن
اسمعوه فإن ذلك الرجل يأخذ العقول
اسمعوه فإن القلب القاسى يلين مع صوته
اسمعوه فكفى بنعمة القرآن نعمه
فمن شاء ذكره
سورة عبس

_______________________________
على الهامش
من بداية مشروع مدونات مصريه للجيب وحدث لى ثلاثة اشياء
لا انام ... اخاف الشهرة .... وارغب فى الزواج

رسم تجريدى

أنا بين ضلوع الشمس ساكن من سنين
معرفش غير النيل
وصرخة شيخ بيندهلى
فى حسه أنيـــــــــــــــــــــــن
وبسمة طفل محفوره
ما بين وجدانه شوق وحنين
وحلم سجيـــــــــــــــن
وناس عايشه بتتنهد
وناس مســــــــــاكين
ـــــــــــــــــــــــــــــــــــــــــــــــــــــــــــــــــ
2
ما بلاش تتحمل أكتر من تراتيل الصمت فى الحانك
أنا عارف انك لسه شجاع
لكن مغرور
أو جايز انك مستعجل
يمكن مبهــــــــــــــــــــور
انا عارف انك طيب جدا
أيامك بتمرفى ساعه
وساعاتك أيامها كتير
وحنينك لسه لوحده أسير
والناس فاكراك من جوه ملاك
وملاك الناس فى عيونها كبير
واكمنك نفسك تبقى ملاك
تلاقيك محتار
والناس بتحاسبك على انك من جوه ملاك
إنسان محبوس جواك
بيحاول يصرخ ويقول انا زى الناس انسان
وحنيـــــــــــــــــــــن
وسنيـــــــــــــــــــــن
ودموع مكبوته فى قلب حزين
انا عارف انك لسه شجاع .. وضعيف
أصلك انسان
ــــــــــــــــــــــــــــــــــــــــــــــــــــــــــــــــ
3
إقتل خوفك
حرر كل معانى حروفك
فكر حبه فى نفسك جايز
يقوى الحلم
عافر ويا ظنونك جايز
تقتل وهم
لم دروعك
فك سيوفك
واقتل خوف الناس م الظلمه
واعمل مركب
حط عليها كلوب وغنى
أنا مستنى
عدى البحر لوحدك حتى
مش هتحرك
انا مستنى
ـــــــــــــــــــــــــــــــــــــــــــــــــــــــ
4
بتموت فى عيون الناس المبهوره
وتمـــــــــــــــــــــــــــــــــــوت
وتعدى عليك ايام وتفوت
أنا فاكرك انك فعلاً شيخ
ولقيت الدقن بتتركب
ولقيت الصبغه البيضه المركونه فى دماغ الناس
ولقيت احساس بيقول انك
بتحاول لكن فيه احساس
وكأنك مخنوق
وكأنك مخدوع وبتتأمل
حيران
والحيره شيطان
وكأنك صوره ملعونه لخيال انسان
وكأنك ظل لحدوته
عن طفل وديع وحصله جنان
كان نفسه يكون مشهور
واهو بقى مشهور
لكن حيران
ـــــــــــــــــــــــــــــــــــــــــــ
5
غير شرايينك
واهتف لما الظلمه تموت
اهتف او صوّت ولا اصرخ
او حتى تموت
مش فارقه معاك
ولا ينفع حتى انين الناس وياك
خليك قاسى لو حتى يومين
حاول تتمرد على اى حنين
ملعونه الضحكه المسروقه
ملعونه وشوش الناس الكدابه
ملعون احساس الخوف جواك
غير شرايينك
غير طعم الحلم
واقتل احاسيس الضعف المطويه
والمسكونه على شكل حنين
واصرخ او صوّت او حتى تموت
ايامك فايته ومعدوده
خليها تفوت
ــــــــــــــــــــــــــــــــــــــــــــــــــــــــ
خمس رسوم تجريديه رسمتها بنفسى والسادسه منقوله من كتاب ذاكرة النخيل للشاعر فراج مطاوع بعنوان مصباح
كم كنت أحسب ان ضوئى لا يضاهىَ
أهدى نعال الخلق
فى ليل السكك
وأظل سهرانا امام البيت
تمتنع الذئاب ويقبل العسس/الفراش
يطفن حولى .. أبتهج
فى ليلةٍ
نسى الصديق الزرَّ
لم أطفأ
وعشت الى صباحٍ مبهرٍ
فرأيت نور الشمس أول مرةٍ
وذهلت من جهل الزجاج
عرفت أن الليل
يمنحنى
الجلوس على عروش ممالكه
(طريد ضوئى )
وعرفت قدرى بين عمدان الشوراع
ـ
ـــــــــــــــــــــــــــــــــــــــــــــــــــــــــــــــــ

بيموت الضعف فى قلبى وانا حابب انه يظل تملى ضعيف
احمد مهنى